SQO-ǵa jumysqa kelgen sheteldikterdiń sany shamamen eki ese artty
SQO polıtsııa departamenti baspasóz qyzmetiniń málimetinshe, kóshi-qon qyzmetiniń polıtseıleri áleýmettik jelidegi vedomstvonyń resmı akkaýnttarynda halyqpen onlaın rejıminde dıalog júrgizdi. Strımıng kóshi-qon qyzmetiniń alty aıdaǵy jumysyna arnaldy.
Instagram jáne Facebook qoldanýshylary shetelge qonaqqa shyǵý úshin qandaı qujattar qajet, SQO-ǵa qaı elderden sheteldikter jıi keledi degen sııaqty túrli suraqtar qoıdy. Tikeleı efırge kóshi-qon qyzmeti basqarmasynyń aǵa ınspektory Samat Bazylov jáne sol basqarmanyń ınspektory Sábıt Júsipov shyqty. Polıtseıler jumystaǵy negizgi basymdyqtardyń biri - memlekettik qyzmetterdi sapaly jáne ýaqtyly kórsetý ekenin atap ótti. Jyl basynan óńirde 63 myńnan astam memlekettik qyzmet kórsetilgen.
«Oblys aýmaǵynda 5815 sheteldik jáne azamattyǵy joq 255 adam turady. Jarty jyldyń ishinde jumysqa ornalasýǵa 1205 patent berildi, bul ótken jyldan 44 %-ke kóp. Іshki kóshi-qonǵa baqylaýdy qamtamasyz etý kezinde turǵylyqty jeri boıynsha 19 myńnan astam azamat tirkeldi. Jeke kýálikti alýǵa 31 036 ótinish, tólqujatqa 8072 ótinish resimdelgen. Bul eń suranysqa ıe memlekettik qyzmet», - deıdi SQO PD kóshi-qon qyzmeti basqarmasynyń aǵa ınspektory Samat Bazylov.
Elde bolý erejelerin buzǵany úshin 219 adam ákimshilik jaýapkershilikke tartyldy, onyń 24-i el aýmaǵynan shyǵaryldy. Sheteldikterdi eńbekke zańsyz tartqany úshin 32 jumys berýshige aıyppul salyndy. Budan bólek, alty aıdyń ishinde oblys aýmaǵynda sheteldikterge qatysty 28 qylmys jasalsa, onyń 16-sy sheteldikterdiń tarapynan bolǵan.
Samat Bazylov efır barysynda oblys turǵyndary men qonaqtaryn kóshi-qon qyzmetine qatysty suraqtarmen jumys kúnderi 8 (7152) 34-00-50 telefon nómirine, syrtqy kóshi-qon boıynsha 8 (7152) 34-00-23, azamattyq máseleleri boıynsha 8 (7152) 34-00-35 telefondaryna júgine alatyndaryn eske saldy.
Polıtseılerdiń aıtýynsha, oblysta 16-17 shilde aralyǵynda «Jolda qabyldaý» respýblıkalyq aktsııasynyń kezekti kezeńi ótedi. Ákimshilik polıtsııa, protsessıngtik ortalyq, patrýldik polıtseıler, ýchaskelik polıtsııa ınspektorlary, kóshi-qon qyzmeti – qalalyq, aýdandyq polıtsııa bólinisteriniń barlyq jetekshi qyzmetteriniń polıtseıleri eki kún boıy turǵyndarǵa keńes berip, Facebook jáne Instagram jelilerinde onlaın rejıminde qoldanýshylardyń suraqtaryna jaýap beredi.
