SQO-ǵa «jumys isteýge» kelgen aqmolalyq eki jas sıntetıkalyq esirtkimen ustaldy
PETROPAVL. KAZINFORM – Soltústik Qazaqstan oblysynyń polıtseıleri Aqmola oblysynyń 20 jáne 17 jastaǵy eki turǵynynan bir keli sıntetıkalyq esirtki tárkiledi.
SQO Polıtsııa departamenti baspasóz qyzmetiniń málimetinshe, jigitter sıntetıkalyq esirtki satýmen aınalysatyn ınternet-dúkende jumys istegen. Polıtseılerdiń aqparaty boıynsha, olar Petropavlǵa asa iri kólemdegi esirtki partııasyn býyp-túıý úshin kelip otyrǵan. Osylaı kezekti ret «jumysqa» kelgende jedel ýákilder olardy Rıjskaıa kóshesinde qolǵa túsirdi. Jeke tekserý jáne jalǵa alǵan páterdi tintý kezinde 664 gramnan astam mefedron men túıinshekterge, paketterge, tipti as úıdiń tarelkesine salynǵan 358 gramnan astam α-PvP esirtkisi tabyldy. Tárkilengen zattyń jalpy salmaǵy 1 keliden asty.
«Esirtki bıznesimen aınalysatyndar býyp-túıýshiler men jasyrýshylardy jumysqa alarda «qaýipsizdikti» ýáde etip, polıtsııanyń qolyna túspeýdiń joldaryna úıretedi. Biraq esirtki taratýdy bastap, jeńil aqsha tabýǵa kiriskenderdi anyqtaý jáne ustaý polıtsııa úshin úlken qıyndyq týdyrmaıdy. Ádette olar kóp degende úsh aı ǵana istep, ustalady. Bul jigitter de sonsha ýaqyt zańsyz kásippen aınalysqan. Kámeletke tolmaǵan kúdikti úıqamaqqa alyndy, al úlkeni kúzetpen qamaýǵa alyndy. Ekeýi de 15 jylǵa bas bostandyǵynan aıyrylýy múmkin», - deıdi SQO PD esirtki qylmysyna qarsy is-qımyl basqarmasynyń bastyǵy Rýslan Saparov.
Buǵan deıin SQO-da jylytý maýsymyna daıyndyq boıynsha kóshpeli keńes ótkenin jazǵan edik.
