SQO-ǵa jyl basynan beri 690 otbasy qonys aýdardy
PETROPAVL. KAZINFORM — Soltústik Qazaqstan oblysyna jyl bastalǵaly eńbek kúshi artyq óńirlerden úsh myńǵa jýyq adam kóship keldi.
SQO Eńbek mobıldiligi ortalyǵynyń málimetinshe, budan bólek 129 múshesi bar 48 qandas otbasy qonys aýdardy. Olar Qytaı halyq respýblıkasynan, Reseı men Ózbekstannan kelgen.
Bıyl SQO-ǵa qonys aýdarýshylar úshin 800 otbasyǵa nemese 2820 adamǵa arnalǵan óńirlik kvota belgilengen. Qazirgi tańda jospar 99,9% oryndalyp otyr.
Al qandastarǵa arnalǵan óńirlik kvota 68 otbasyǵa, ıaǵnı 207 adamǵa arnalǵan.
Eńbek mobıldiligi ortalyǵyndaǵy qandastardy beıimdeý jáne ıntegratsııalaý bólimi azamattardy kelgen sátten bastap keshendi súıemeldeýdi qamtamasyz etedi. Mamandar qujat rásimdeý, jumysqa ornalasý, turǵyn úı izdeý, balalardy bilim berý uıymdaryna ornalastyrý jáne medıtsınalyq kómek alý máselelerin sheshýge kómektesedi.
Atap aıtqanda, azamattarǵa jeke sáıkestendirý nómirin (JSN) alý, abonenttik telefon nómirin rásimdeý, elektrondyq tsıfrlyq qoltańba alý jáne turǵylyqty jeri boıynsha tirkelý kezinde kómek kórsetiledi. Qajet bolǵan jaǵdaıda qujattardy aýdarý jáne kóshi-qon qyzmeti organdaryna barý kezinde súıemeldeý uıymdastyrylady.
Sonymen qatar qandastar men qonys aýdarýshylarǵa Qazaqstan Respýblıkasynyń azamattyǵyn alý, óńirlik kvotaǵa engizilý, áleýmettik járdemaqylardy rásimdeý jáne quqyqtyq máseleler boıynsha konsýltatsııalar beriledi.
Mamandar kelgen azamattarǵa Qazaqstannyń tarıhy, mádenıeti men dástúrleri, zańnama negizderi jáne shaǵyn bıznes ashý múmkindikteri týraly túsindirý jumystaryn júrgizedi. Qazaq jáne orys tilderin úırenýge de járdem kórsetiledi.
Buǵan deıin eńbek kúshi artyq óńirlerden jáne shetelden qonys aýdarýshylarǵa memleket qandaı shyǵyndardy óteıtinin jazǵan edik.
