SQO-ǵa jarty jylda myńnan astam asyl tuqymdy iri qara ákelindi

PETROPAVL. KAZINFORM – Soltústik Qazaqstan oblysynda jyl basynan beri brýtsellez, qutyrma jáne jylqy tumaýy men rınopnevmonııaǵa qatysty 9 qolaısyz pýnkt tirkeldi. Munda saýyqtyrý sharalarynyń buzylýyna baılanysty 1,9 mln teńgeniń 17 aıyppuly salyndy.

Veterınarııalyq baqylaý jáne qadaǵalaý komıteti SQO boıynsha aýmaqtyq ınspektsııasy basshysynyń orynbasary Orazbek Batyrbekovtyń aıtýynsha, aýmaqtyq ınspektsııa veterınarııa salasyndaǵy veterınarııalyq zańnamanyń oryndalýyn, memlekettik shekaradan ótý kezindegi baqylaý, bıologııalyq jáne azyq-túlik qaýipsizdigin qamtamasyz etý kiredi.

SQO-da vedomstvo bıyl jalpy somasy 9 mln teńgeden asatyn túrli aıyppul salǵan.

«Qolaısyz pýnktterde saýyqtyrý sharalaryn buzǵany úshin 1,9 mln teńgege jýyq 17 aıyppul salyndy.

Bıologııalyq qaýipsizdik salasyndaǵy zań buzýshylyqtar boıynsha, ıaǵnı veterınarııalyq is-sharalardy júrgizý kezinde, sondaı-aq veterınarııa salasyndaǵy normatıvtik quqyqtyq aktilerdi buzǵany úshin 7,5 mln teńge somasyna 219 ákimshilik aıyppul salyndy. Bul byltyrǵydan 2,5 mln teńgege artyq.

Jeke jáne zańdy tulǵalarǵa QR Veterınarııa salasyndaǵy zańnama talaptaryn buzýdy joıý týraly 262 dana uıǵarym berildi, onyń basym bóligi oryndaldy», - deıdi Orazbek Batyrbekov.

Mamannyń aıtýynsha, SQO-ǵa bıylǵy alǵashqy jarty jyldyqta shetelden 1043 bas asyl tuqymdy iri qara mal jetkizilgen. Sıyrlar negizinen Germanııadan jáne Chehııa, Danııa, Majarstannan ákelingen eken.

Buǵan deıin Shymkentte brýtsellez aýrýynyń anyqtalýyna baılanysty sanıtarlyq shekteýler engiziletinin jazǵan edik.