SQO-ǵa týrısterdiń kóptep kelýine ne kedergi

Bul máseleler SQO Kásipkerler palatasynda Týrızm jáne qyzmet kórsetý salasy mamandarynyń qatysýymen ótken jıynda kóterildi. Vedomstvonyń baspasóz qyzmetiniń málimetinshe, otyrysqa «Atameken» Ulttyq kásipkerler palatasy Investıtsııalar departamenti dırektorynyń orynbasary Nazgúl Ýzalına da qatysty.

Kásipkerlerdiń aıtýynsha, ásirese Imantaý-Shalqar kýrorttyq aımaǵynda mobıldi baılanys pen ınternettiń nasharlyǵy týrıster úshin eleýli qolaısyzdyq týǵyzady. Petropavldan shamamen 20 shaqyrym alystaǵannan keıin uıaly baılanys sapasy tómendeı bastaıdy. Bul navıgatsııaǵa ǵana emes, demalýshylardyń qaýipsizdigine de áser etedi.

Týrızm jónindegi salalyq keńestiń tóraǵasy Vladımır Vıtchenko bul másele birneshe ret kóterilgenin atap ótti. Onyń aıtýynsha, baılanys operatorlary kýrorttyq aımaqta abonenttik trafıktiń maýsymnan tys ýaqytta az bolýyna baılanysty munda bazalyq stantsııa ornatýdy ekonomıkalyq turǵydan tıimsiz sanaıdy.

— Bul máseleni biz SQO Kásipkerler palatasynyń alańynda birneshe ret kóterdik. Sondaı-aq QR Tsıfrlyq damý jáne ınnovatsııalar mınıstrligine hat joldap, oblystyń týrıstik nysandarynda turaqty mobıldi baılanystyń joqtyǵy máselesin Ulttyq kásipkerler palatasynyń problemalyq máseleler tiziminen alyp tastamaýdy suradyq. Mınıstrliktiń jaýaby kóńilden shyqpady. Óıtkeni onda tıisti jumystar 2027 jyly júrgiziletini aıtylǵanymen, ony kim atqaratyny, qarjy qaıdan bólinetini jáne qaı taraptyń qandaı mindetti moınyna alatyny kórsetilmegen, ıaǵnı, másele ashyq kúıinde qalyp otyr. Munda ınvestıtsııa tartý qajet bolýy múmkin. Máselen, uıaly baılanys operatorlaryna qoldaý kórsetip, bazalyq stantsııalar ornatýyna jaǵdaı jasaý kerek, — deıdi Vladımır Vıtchenko.

Máseleni sheshýdiń bir joly — operatorlarǵa antennalyq-dińgektik qurylys ornatyp, oǵan elektr jelisin tartyp berý. Osy jumystar atqarylsa, baılanys operatorlarynyń aımaqqa kirý múmkindigi artady.

Alaıda kásipkerler mundaı ınfraqurylymdy aýdandyq bıýdjet esebinen ǵana salý qıyn ekenin aıtyp, ınvestıtsııalyq qoldaýdyń qajettigin alǵa tartty.

Kýrorttyq aımaqtardaǵy taǵy bir ózekti másele — turmystyq qaldyqtardy shyǵarý. Qoldanystaǵy ekologııalyq talaptarǵa sáıkes, ulttyq park aýmaǵynda qoqys polıgonyn ornalastyrýǵa bolmaıdy. Sonyń saldarynan Imantaý-Shalqar kýrorttyq aımaǵynda jumys isteıtin 48 demalys bazasy qoqysty shamamen 90 shaqyrym jerge tasymaldaýǵa májbúr.  Bul kásipkerler úshin qosymsha shyǵyn. Ásirese týrıster kóp keletin jazǵy maýsymda qoqys kólemi artatyndyqtan, másele odan saıyn kúrdelene túsedi. Kásipkerlerdiń pikirinshe, bul máseleniń sheshilmeýi zańsyz qoqys oryndarynyń paıda bolýyna da áser etýi múmkin. Qoqys tógý problemasy segiz jyldan astam ýaqyt boıy kóterilip keledi. Sondyqtan kásipkerler ony zańdyq turǵyda sheshý qajet dep sanaıdy.

Jıynda balalar-jasóspirimder jáne stýdenttik saýyqtyrý týrızminiń qazirgi jaı-kúıi de sóz boldy. Vladımır Vıtchenkonyń aıtýynsha, óńirde 200-den astam balalar saýyqtyrý lageri jabylǵan. Qoldanysta qalǵan nysandardyń basym bóligi tek jaz aılarynda jumys isteıdi.
Munyń bir sebebi — nysandardy senimgerlik basqarýǵa nemese memlekettik-jekeshelik áriptestik tetigi arqyly ınvestorlarǵa berý merziminiń qysqalyǵy. Kásipkerlerdiń sózinshe, orta eseppen bes jylǵa jasalǵan kelisim ınvestordyń qomaqty qarjysyn qaıtarýyna jetkiliksiz.

Sondyqtan bıznes ókilderi mundaı nysandardy ınvestorlarǵa 20-30 jylǵa deıin uzaq merzimge berý, sondaı-aq jyl boıy jumys isteıtin balalar saýyqtyrý keshenderin salýǵa múmkindik jasaý qajet dep esepteıdi. Sonymen qatar memlekettik qoldaý men sýbsıdııalaý tetikterin naqtylaýdy usynyp otyr.

Jıyn barysynda aıtylǵan usynystar «Atameken» Ulttyq kásipkerler palatasynyń Investıtsııalar departamentine joldandy. Kásipkerler kótergen máseleler egjeı-tegjeıli zerdelenip, qajet bolǵan jaǵdaıda Úkimet deńgeıine shyǵarylmaq.

Buǵan deıin Aqtóbe týrızminde qandaı túıtkil bar ekenin jazǵan edik.