SQO-ǵa turaqty turýǵa kelgen sheteldikter sany úsh ese ósken
PETROPAVL. KAZINFORM — Soltústik Qazaqstan oblysynda byltyr 195 sheteldik Qazaqstan azamattyǵyn aldy, olardyń kóbi Reseı, Ózbekstan jáne Mońǵolııadan kelgender.
Resmı derekterge sáıkes, oblys aýmaǵyna turaqty turýǵa 2023 jyly 1421 sheteldik azamat kelgen bolsa, 2024 jyly — 416, al 2025 jyly turaqty turýǵa kelgen sheteldikter sany 1046 adamǵa jetti.
Byltyr SQO-da turaqtaǵan shetel azamattarynyń basym bóligi — 170-i Reseıden, sondaı-aq 47 — Tájikstannan, 41 — Ózbekstannan, 37 — Qytaı Halyq Respýblıkasynan, 12 adamnan Ázerbaıjan men Ýkraınadan kelgen.
Qazaqstan pasportyn alǵandardyń ishinde de Reseıdiń úlesi basym. Kórshi elden — 60, Ózbekstannan — 32, Mońǵolııadan — 31, QHR — 28, Tájikstannan — 15, Túrikmenstannan — 11, Ázerbaıjannan — 3, Armenııadan — 3, múlde azamattyǵy joq adamdardyń úsheýi jáne Aýǵanstan, Iran, Ýkraınadan bir adamnan Qazaqstan azamaty atandy.
Qazirgi tańda oblys aýmaǵynda ýaqytsha turýǵa tirkelgen 5116 sheteldik azamat bar. Al 2026 jyldyń basynan beri óńirge jumys isteý maqsatynda 2800-den astam sheteldik tirkelgen.
— Kóshi-qon zańnamasynyń saqtalýy únemi baqylaýda. Byltyr kóshi-qon salasynda 13,5 myń ákimshilik quqyqbuzýshylyq anyqtalyp, onyń ishinde 1733 sheteldik ákimshilik jaýapkershilikke tartylǵan. Negizgi quqyq buzýshylyqtardyń biri — Qazaqstan Respýblıkasynyń aýmaǵynda bolý qaǵıdalaryn buzý. Osy jyldyń alǵashqy bes aıynda kóshi-qon salasynda 6 myńǵa jýyq ákimshilik quqyqbuzýshylyq tirkelip, 286 sheteldik azamat Qazaqstan Respýblıkasynyń Ákimshilik quqyq buzýshylyq týraly kodeksiniń 517-baby boıynsha jaýapkershilikke tartyldy, — deıdi SQO polıtsııa departamenti kóshi-qon qyzmeti basqarmasy bastyǵynyń mindetin atqarýshy Edil Qazıev.
Zań talaptaryn buzǵan shetel azamattary sot sheshimimen el aýmaǵynan shyǵarylady. Byltyr Qazaqstan aýmaǵynda bolý qaǵıdalaryn buzǵany úshin 83 sheteldik shekara asyrylsa, Bıyl mundaı sheshim 31 adamǵa qatysty qabyldandy.
Buǵan deıin Astanada kóshi-qon shemasyn uıymdastyryp, 900 mln teńge paıda tapqan alaıaq sottalǵanyn jazǵan edik.
