SQO-ǵa tumaýǵa qarsy 60 myń doza vaktsına jetkizildi

PETROPAVL. QazAqparat – Soltústik Qazaqstan oblysynda 1 qazannan bastap 15 qarashaǵa deıin tumaýǵa qarsy ımmýndaý bastalady. Osy maqsatqa óńirge 60 myń doza «Grıppol plıýs» preparaty jetkizildi, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń málimetinshe, tumaýǵa qarsy qoıylatyn «Grıppol plıýs» preparatynda vırýstyń 3 antıgeni A/Victoria/2570/2019 (H1N1)pdm09, A/Darwin/9/2021 (H3N2) jáne V/Austria/1359417/2021 bar. Bul DDU boljamynsha bıyl taralýy tıis tumaýdyń shtammdary, al vaktsına halyqty osy qaýipti aýrýdan qorǵamaq.

«Bıyl da halyqtyń belgili bir tobyna tumaýǵa qarsy vaktsınany tegin qoıýǵa qarjy bólindi. Ony ózderi qaralatyn emhanadan qoıǵyzýǵa bolady. Tegin vaktsınany júktiliktiń 2-3 trımestrindegi áıelder, qazir tirkeýde turǵan olardyń sany 70-den asady jáne 8,5 myń medıtsınalyq qyzmetker qoıdyrady. Budan basqa dıspanserlik esepke alynǵan balalarǵa, jıi aýyratyn 6 aıdan joǵary sábılerge, arnaıy mekemelerde tárbıelenip jatqan balalarǵa, medıtsınalyq-áleýmettik mekemelerdiń turǵyndaryna, júrek-qan tamyrlary jáne tynys organdarynyń sozylmaly aýrýlary bar syrqattarǵa jáne epıdemıologııalyq kórsetkishteri barlarǵa da ekpe tegin jasalady», - deıdi SQO sanıtarııalyq-epıdemıologııalyq baqylaý departamentiniń basshysy Áset Jumataev.

Osylaısha turǵyndardyń 13,8 % tumaýǵa qarsy tegin vaktsınamen qamtylmaq.

Áset Jumataevtyń aıtýynsha, SQOnyń densaýlyq saqtaý basqarmasy ekonomııa esebinen taǵy 15 myń dozaǵa tapsyrys berdi.

Bıyl tumaýǵa qatysty jaǵdaı kúrdeli, ótken jyldyń osy merzimimen salystyrǵanda qaýipti vırýsty juqtyrǵandar sany 27 adamǵa artqan.