SQO-ǵa tsıklon jaýyn-shashyn ákele jatyr: eskertý jarııalandy
PETROPAVL. KAZINFORM – Soltústik Qazaqstan oblysynda aldaǵy kúnderi jaýyn jaýyp, jyly aýa raıy saqtalmaq. Bul qardyń qarqyndy erýine ákelmek.
«Qazgıdromet» RMK SQO fılıalynyń málimetinshe, Qostanaı Aqmola oblysynda bolǵan tsıklon búgin óńirge jetip, aldaǵy kúnderi jaýyn-shashyndy bolady. Osyǵan oraı 31 naýryzǵa deıin eskertý jarııalandy.
«SQO-da aldaǵy kúnderi jaýyn-shashyn men oń temperatýraǵa baılanysty qar qarqyndy erimek. Qardyń kóptigin, topyraqtyń kúzgi ylǵaldylyǵyn jáne muz qyrtysynyń bolýyn eskersek, erigen qar sýynyń topyraqqa sińýi qıyn bolady. Bul jer betinde sý aǵynynyń paıda bolýyna, muzdyń erip, sý deńgeıiniń kóterilýine ákeledi. Oblystaǵy shaǵyn ózenderdiń arnasynan shyǵý qaýpi bar», - deıdi «Qazgıdromet» RMK SQO fılıalynyń dırektory Qymbat Merǵalımova.
