SQO-ǵa tasqynmen kúreske kórshi oblystardan qutqarýshylar kómekke keldi
PETROPAVL. KAZINFORM – Petropavlda búgin-erteń sý tasqyny sharyqtaý sheginen ótedi. Barlyq arnaıy qyzmet qazir qaýip tóngen eldi mekender janynda bógetterdi nyǵaıtyp jatyr.
Esil ózeni deńgeıiniń kóterilýine baılanysty Soltústik Qazaqstan oblysynyń Qyzyljar aýdany men Petropavldyń Zarechnyı kentinde jaǵdaı kúrdelene túsken.
«Qazgıdromet» RMK SQO fılıalynyń málimetinshe, tańǵy saǵat 8.00-den bastap saǵat 16.00-ge deıin oblys ortalyǵynda sý deńgeıi 12 sm kóterildi. Qaýipti deńgeı 1 130 sm bolsa, qazir 1 145 sm-ge jetti. Sý áli kelip jatyr.
QR Tótenshe jaǵdaılar mınıstri Shyńǵys Árinov óńirdegi jedel qyzmetterdiń is-qımylyn úılestirip, bógetterdi nyǵaıtý jumystaryna ınspektsııa júrgizdi, kúsheıtilgen rejımde sý tasqynyna qarsy is-sharalardyń oryndalýyn baqylaýǵa aldy.
Sý tasqynyna qarsy is-sharalarǵa TJM, ІІM, jergilikti atqarýshy organdardyń Ulttyq ulannyń jáne TJM áskerı bólimderiniń jeke quramynan 1 600-den astam adam, 152 arnaıy tehnıka jumyldyryldy.
– Qazirgi ýaqytta Prıbrejnoe, Teplıchnoe jáne Petropavldaǵy Zarechnyı kenti mańyndaǵy bógetter nyǵaıtylyp jatyr. Astana qalasynan, Aqmola, Qostanaı oblystarynan jáne M.Ǵabdýllın atyndaǵy Azamattyq qorǵaý akademııasynan áriptesterimiz kómekke keldi. Qazir Teplıchnoe eldi mekeninen turǵyndar óz erkimen evakýatsııalanyp jatyr. Kúrdeli jaǵdaı týyndasa azamattardyń qaýipsizdigi úshin bárin qaýipsiz jerge kóshiretin bolamyz, - dedi SQO TJD josparlaý jáne jedel basqarý ortalyǵynyń bastyǵy Vladımır Hýtınaev.
Buǵan deıin SQO-daǵy Teplıchnoe aýylynan turǵyndardy evakýatsııalap jatqanyn jazǵan edik.