SQO-ǵa tamyzda 169 dáriger jumysqa keledi
PETROPAVL. QazAqparat – Soltústik Qazaqstan oblysynda bıyl dáriger jetispeýshiligi máselesi 62%-ke sheshiledi, dep habarlaıdy QazAqparat tilshisi.
SQO ákimi Qumar Aqsaqalov oblystyq máslıhat depýtattary men oblys aktıviniń aldynda alǵashqy jarty jyldyq boıynsha esep berdi. Onyń pikirinshe, turǵyndar densaýlyǵyn saqtaý negizgi mindetterdiń biri. Bul salada kópten beri sheshimin tappaı kele jatqan másele – medıtsınalyq kadrlardyń jetispeýshiligi. Sondaı-aq densaýlyq saqtaý nysandarynyń 62,5% eskirgen.
Dárigerlerdiń tapshylyǵy óńirde birtindep sheshilip keledi. Máselen bıyl tamyz aıynda oblysqa 169 maman kelmek. Olar elimizdegi medıtsınalyq joǵary oqý oryndarynyń túlekteri. Dárigerlerdiń 86-sy jumysqa aýyldyq jerlerge attanady. Qalǵan 83-i Petropavldaǵy emdeý mekemelerine ornalasady.
«Oblysqa dárigerlerdi tartýda aýqymdy jumys atqaryldy. Máseleni sheshý úshin Densaýlyq saqtaý mınıstrligi men medıtsınalyq joǵary oqý oryndaryna júgindik. Dárigerlerge kórsetiletin áleýmettik kómekti eseledik. Máselen 2018 jyldan beri aýylǵa baratyn mamanǵa 1,5 mln teńge, oblys ortalyǵynda qalatyndarǵa 505 myń teńge demeýqarjy berilip keledi», - dedi Qumar Aqsaqalov.
Budan basqa bıyl alǵash ret elimizdegi joǵary oqý oryndarynyń rezıdentýrasynda bilimderin jetildirý úshin 78 mamanǵa 45 mln teńge bólindi. Eki jyldan keıin ol mamandar óńirge qaıtyp keledi. Al kórsetiletin qyzmet sapasyn arttyrý úshin kelesi jyly 200 dáriger respýblıkalyq jáne alys-jaqyn shet elderdiń klınıkalarynda biliktilikterin arttyrady.
