SQO-ǵa sý tasqynymen kúreske kómekke kelgen almatylyq áskerıler úılerine qaıtty
PETROPAVL. KAZINFORM — Soltústik Qazaqstan oblysyna sý tasqynyna qarsy is-sharalarǵa qatysqan 28237 áskerı bóliminiń áskerı qyzmetshilerin óńir turǵyndary saltanatty túrde shyǵaryp saldy.
QR Tótenshe jaǵdaılar mınıstrliginiń Baýyrjan Momyshuly atyndaǵy 28237 áskerı bóliminiń 100 áskerı qyzmetshisi óńirge naýryz aıynyń sońynda kelgen edi. Ózderimen birge 80 tehnıka, júzý quraldary, motopompalardy ákeldi. Osylaısha, alǵashqy kúnderden bastap halyqtyń qaýipsizdigin qamtamasyz etti.
SQO Tótenshe jaǵdaılar departamentiniń málimetinshe, bólimshe kúshimen Qyzyljar aýdanynda jáne Petropavl mańynda qorǵanys dambalary nyǵaıtyldy: ondaǵan myń qap ınertti materıaldarmen toltyrylyp, sýdyń jolynda turǵan bógetterge tóseldi. Jaǵalaýdy bekitý jumystaryn atqardy.
Áskerı qyzmetshilerdi óńir basshylyǵy men TJD ókilderi shyǵaryp salyp, alǵys hattar men estelik syılyqtar tabystady.
Bıyl óńirde kóktem qalypty jaǵdaıda ótip jatyr.
«Qazgıdromet» kásiporny oblystyq fılıalynyń málimetinshe, sý tasqynynyń ekinshi tolqyny Sergeev sý qoımasynan ótti. Munda sý deńgeıi birtindep túsip keledi.
Esil ózeniniń sý deńgeıi Petropavl mańynda kóterilip jatyr. Ótken táýlikte gıdrologııalyq bekette sý deńgeıi 17 sm-ge artty. Sharyqtaý shegi, boljam boıynsha, mamyr aıynyń basyna kelmek.
Buǵan deıin sý tasqynyna qatysty jaǵdaı Soltústik Qazaqstan oblysy men Shyǵys Qazaqstan oblysynda áli de baqylaýda turǵanyn jazǵan edik.
