SQO-ǵa sáýirdiń sońyna deıin 30 myńnan astam koronavırýs vaktsınasy jetkiziledi

SQO densaýlyq saqtaý basqarmasynyń basshysy mindetin atqarýshy Nurlan Aımanov óńirde vaktsınatsııa naýqanynyń qalaı júrgizilip jatqanyn málim etti.

Nurlan Baqdáýletulynyń aıtýynsha, SQO-ǵa vaktsınanyń alǵashqy partııasy – 1200 doza aqpan aıynyń basynda jetkizildi. Ol birinshi kezekte medıtsınalyq qyzmetkerlerge egildi.

«Basynda turǵyndar tarapynan senimsizdik boldy. Ekpeniń paıdasyna shúbá keltirdi. 1 sáýirdegi Memleket basshysynyń sózinen keıin jaǵdaı kúrt ózgerdi.

Eki kúnde 2200 adam vaktsına salǵyzdy. Jalpy óńir boıynsha ekpeniń birinshi komponentin alǵandar sany 7 myńnan asady», - dedi Nurlan Aımanov.

Al erteń SQO-ǵa vaktsınanyń kezekti partııasy – 7 myń preparat jetkizilmek.

«Sáýir aıynyń sońyna deıin 30 myńnan astam koronavırýs vaktsınasy oblysqa ákelinedi. «SK-Farmatsııa» jetkizedi. Densaýlyq saqtaý basqarmasy barlyq talaptardy saqtaı otyra qabyldap alady. 13 sáýir taǵy 7 myń doza jetkiziledi, odan keıin 7000, 2200, 9200 jáne 7 myń vaktsına ákelinedi.

Arnaıy jaraqtandyrylǵan qoımalarymyz bar. Keıin olardy emhanalarǵa bólip beremiz. Olar termokonteınerlermen kelip alyp ketedi. Barlyǵy vaktsınany saqtaıtyn qajetti qondyrǵylarmen jaraqtandyrylǵan», - dedi Nurlan Aımanov.

13 aýdan jáne Petropavldyń 4 emhanasynda qazir 22 egý kabıneti bar.

Jaqynda olardyń sanyn 88-ge deıin jetkizý josparlanǵan.

«Vaktsına alǵan adam koronavırýs juqtyrmaıdy degen qate, alaıda juqtyrǵanymen ol jeńil ótedi, asqynbaıdy. Sol sebepti qarsy medıtsınalyq kórsetilim bolmasa ekpe alǵan jón. Vaktsına alý úshin aldyn ala jazylý kerek. Tańǵy saǵat 8.00-den 20.00-ge deıin jazylýǵa bolady.

Qazir ár emhana ınternet arqyly jazylýǵa bolatyndaı qosymsha daıyndap jatyr. Vaktsına túskesin medıtsınalyq qyzmetker telefon arqyly habarlasyp, qaı kúni, qaı ýaqytta vaktsına alýǵa bolatynyn aıtady», - dedi SQO densaýlyq saqtaý basqarmasynyń basshysy mindetin atqarýshy