SQO-ǵa otbasymen qonaqqa kelgen qostanaılyq jigit sýǵa ketti
PETROPAVL. QazAqparat – Soltústik Qazaqstan oblysynda 27 jastaǵy qostanaılyq jigit Esil ózenine sýǵa ketti. Ol otbasymen dostaryna qonaqqa kelgen eken, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 29 mamyr kúni Ǵ.Músirepov atyndaǵy aýdannyń Ýrojaınoe eldi mekeniniń mańynda Esil ózeninde er adam sýǵa ketti. Sol kúni jastar otbasylarymen birge demalýǵa barǵan. Ol jerdiń ereksheligi - ózenniń jaǵasy tik jar bolyp keledi. Jigitter sýǵa shomylǵan. Al bireýi jardan ózenge sekirgen. Jaǵaǵa júzip kele jatyp, ıirimge kezikken. Abyrjyp, ne isterin bilmeı qalǵan. Saldarynan sýǵa ketken.
«Er adamnyń denesin oqıǵanyń kýágerleri men aýyl turǵyndary 40 mınýt ishinde taýyp, jaǵaǵa alyp shyqty. Mert bolǵan er adam Qostanaı oblysynyń turǵyny, bul jaqqa joldastaryna otbasymen qonaqqa kelgen eken. Janynda áıeli, balalary bolǵan.
Ýrojaınoe eldi mekeniniń mańyndaǵy Esil ózeninde sýǵa shomylýǵa arnaıy oryn jaraqtandyrylmaǵan. Demalýshylar ol jaıynda bilgen, soǵan qaramastan sýǵa shomylýǵa kelgen. Qaza tapqan jigit 27 jasta», - deıdi azamattyq qorǵanys basqarmasy bastyǵynyń mindetin ýaqytsha atqarýshy Kırıll Ivannıkov.
Mamyr aıynyń ortasynan bastap óńirde úsh qaıǵyly jaǵdaı tirkeldi. Sonyń bireýi 23 mamyr kúni «Sosnovyı bor» demalys ornynda boldy. Ol joly kolledjdiń ustazy men sońǵy kýrs stýdenti sýǵa ketken edi.
Taǵy bir oqys oqıǵa osy Ǵ.Músirepov atyndaǵy aýdanda 25 mamyr kúni ıAlta aýylynyń mańyndaǵy Qulager ózeninde boldy. Sýǵa ketken adamnyń denesi sot-medıtsınalyq saraptamaǵa jiberildi. Oqıǵa anyqtalyp jatyr.
Jalpy, elimizdegi sý qoımalarynyń 45 % Soltústik Qazaqstan oblysynda ornalasqan. Mamandardyń aıtýynsha, bul - 2 myńnan astam kól, 60 shaqty ózen, 117 qazanshuńqyr. Solarda tek sýǵa shomylýǵa bolatyn 58 arnaıy oryn ǵana bar. Qalǵan jerde sýǵa túsýge bolmaıdy, adam ómirine qaýipti.
