SQO-ǵa kóship kelýshiler kóbeıdi
PETROPAVL. QazAqparat - Birinshi toqsanda SQO-ǵa qonys aýdarýshylar sany ótken jyldyń osy kezeńimen salystyrǵanda 7,4% artty, dep habarlaıdy «QazAqparat» HAA tilshisi.
SQO statıstıka departamentiniń málimetinshe, óńirdiń halyq sany kóshi-qon esebinen 1319 adamǵa azaıdy. Úsh aıda oblysqa shetelden jáne respýblıkanyń basqa óńirlerinen turaqty turýǵa 1465 adam kóship keldi, bul 2018 jylǵy qańtar-naýryzǵa qaraǵanda 7,4%-ǵa artyq. Oblystan kóship ketkender sany - 2784 adam. Bul - 19,8% artyq. 688 adam shet elderge qonys aýdarsa, Qazaqstannyń basqa óńirlerine 631 adam kóship otyr.
Syrtqa ketetinder negizinen TMD memleketterin tańdaıdy eken. Onyń ishinde 99,6%-y Reseı Federatsııasyna qonys aýdarǵan.
Sondaı-aq, oblysqa TMD elderinen kelgenderdiń arasynda eń úlken úles osy kórshi memleketke tıesili - barlyq kelgenderdiń 78%-yn quraıdy. Jalpy ımmıgranttardyń 85,7%-y TMD elderinen kelgen.
Statıstıka mamandarynyń esebinshe, álemniń basqa elderine oblystyń 88 turǵyny qonys aýdardy, oblysqa turaqty turýǵa 22 adam keldi. Óńir turǵyndary negizinen - 95,6%-y Polsha jáne Germanııaǵa kóshedi eken. Kóship kelgender arasynda Qytaı jáne Germanııa turǵyndary basym, shamamen 95% qurap otyr.
Óńiraralyq kóshi-qon boıynsha kelgender sany 2018 jylǵy qańtar-naýryz aılarymen salystyrǵanda 8,3% kóbeıgen - 1311 adamdy qurady. Al ketkender sany - 1942 adam. Mıgranttardyń 41%-y Aqmola oblysynan, 23,8% - Nur-Sultan qalasynan keldi. Ketkenderdiń de eń úlken úlesi osy óńirlerge tıesili.
