SQO-ǵa kóship kelgenderdiń basym bóligi - Mońǵolııa men Qytaıdan
PETROPAVL. QazAqparat – Soltústik Qazaqstan oblysyna jyl basynan 2 myńnan astam adam qonys aýdarsa, osydan eki ese kóp adam kóship ketti, dep habarlaıdy «QazAqparat» HAA tilshisi.
SQO Statıstıka departamentiniń málimetinshe, óńirge jyl basynan 2398 adam kóship kelgen. Alaıda 4131 adam qonys aýdarǵan. Bul - 2019 jylǵy qańtar-maýsymǵa qaraǵanda 33,1% az. Mıgratsııalyq kemý 1 733 adamdy qurady.
«Oblys aýmaǵynan kóship ketkenderdiń 94,4%-y TMD elderine qonys aýdarsa, sondaı-aq óńirge turýǵa kelgenderdiń 87,1%-y TMD elderiniń azamattary. SQO-dan shyqqan emıgranttardyń negizgi bóligin - 98,9% Reseı qabyldaıdy. Oblysqa TMD elderinen kelgenderdiń arasynda da Reseı kósh bastap tur, onyń úlesi 89,2%», - deıdi SQO Statıstıka departamentiniń bas mamany Olga Býbenko.
Álemniń basqa elderine oblystyń 56 turǵyny qonys aýdardy, al 44 adam óńirge turaqty turýǵa keldi. Shetelge ketetinder negizinen Polsha jáne Germanııany tańdaıdy. Olarǵa basqa elderge ketkenderdiń 94,6%-y qonys aýdardy. Kóship kelgender arasynda Monǵolııa jáne Qytaı turǵyndary basym, olardyń úlesi - 65,9%.
Aımaqaralyq mıgratsııa kemigen. Elimizdiń basqa oblystarynan 2058 adam kóship kelse, 3 134 adam qonys aýdardy. SQO-ǵa mekenjaıyn ózgertkenderdiń basym bóligi Aqmola oblysynyń jáne Nur-Sultan qalasynyń turǵyndary. Óńir turǵyndary da negizinen osy kórshi aımaqtarǵa qonys aýdarady eken.
