SQO-ǵa qonystanatyn otbasylarǵa tegin baspana berý usynyldy
«Bizdiń depýtattyń saýalymyzǵa Elbasynyń Joldaýyna sáıkes, eńbek naryǵyn jańǵyrtý maqsatynda eńbekkerlerdi artyq jumys kúshi bar óńirlerden jumys kúshi jetispeıtin óńirlerge qonystandyrýdyń ózekti máseleleri arqaý boldy. Osy memlekettik turǵydan alǵanda, asa mańyzdy istiń jergilikti jerlerde oryndalýy qanaǵattanarlyqtaı emes. Ótken jyly Úkimet qaýlysymen jumys kúshi artyq óńirlerde turatyn otbasylardy jumys kúshi jetispeıtin óńirlerge qonystandyrýǵa bólingen 463 kvotanyń 196-sy ǵana ıgerilgen. ıAǵnı tıisti tapsyrma nebári 42 paıyzǵa oryndalǵan. Osy oraıda Soltústik Qazaqstan oblysy ǵana aıryqsha múddelilik tanytyp, ótken jyly kvotadaǵy 110 otbasynyń ornyna 129 otbasyny qabyldady»,-dep toqtaldy depýtat.
Bul turǵyda ol aldaǵy ýaqytta turǵyndardy jumys kúshi artyq óńirlerden eńbek kúshi jetispeıtin oblystarǵa qonystandyrý sharalarynyń qarqyny men utymdylyǵyn arttyrý maqsatynda tıisti usynystardy jarııa etti.
«Birinshiden, qonys aýdarýshylardy qabyldaýdyń 2017-2019 jyldarǵa óńirlik kvotasyn bólý máselesin qaıta qaraý qajet. Ótkeni ústimizdegi jyly artyq jumys kúshi bar óńirlerden jumys kúshi jetispeıtin óńirlerge 288 otbasyny qonystandyrý belgilengen. Alaıda bul jetkiliksiz. Sebebi bir ǵana Soltústik Qazaqstan oblysy bıyl kvotadaǵy 110 otbasynyń ornyna 310 otbasyny qabyldaýǵa daıyn ekendigin málimdep otyr», - dedi K. Musyrman.
Onyń paıymynsha, jumys kúshi artyq óńirler turǵyndarynyń eńbek kúshi jetispeıtin oblystarǵa birneshe otbasy bolyp, shoǵyrlana kóshkenin uıymdastyrǵan jón. Munyń ózi, olardyń barǵan jerlerine tezirek beıimdelýine oń áserin tıgizedi.
«Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy boıynsha qonys aýdarýshylardyń turǵyn úıdi jalǵa alýyna bólinetin qyrýar qarjyǵa olardyń ózderi kóship baratyn eldi mekenderdegi bosap turǵan úılerdi satyp alýyna ruqsat berý kerek. Buǵan qosa, qonys aýdarýshylardyń ózderi úshin turǵyn úı salýyna múmkindik týǵyzý jáne olardy tıisti ınfraqurylymmen qamtamasyz etý qajet. Bul sharalar jergilikti atqarýshy organdardyń qonys aýdarýshylardy baspanamen qamtylýyn áldeqaıda jedeldeteri sózsiz. Úkimet bólgen kvotanyń ótken jyly tolyq ıgerilmeýiniń negizgi sebebi osy ekendigi eskerilýge tıisti», - dedi depýtat.
Sonymen qatar ol turǵyn úıdi jalǵa alý kelisimshartynda eger qonys aýdarýshynyń otbasy keminde 5 jyl boıy turǵan jaǵdaıda oǵan sol turǵyn úıdi tegin jekeshelendirý quqyǵy berilýin qarastyrý kerektigin usyndy.
«Qostanaı, Pavlodar, Soltústik Qazaqstan, Shyǵys Qazaqstan oblystarynyń qonys aýdarýshylardy qabyldaýǵa áleýeti bar eldi mekenderdiń tizbesin jasap, olardaǵy bilim berý men densaýlyq saqtaý mekemeleriniń oqýshylar men turǵyndardyń sanynyń azaıýyna baılanysty jabýǵa moratorıı jarııalaǵan jón», - dedi Káribaı Musyrman.
