SQO-ǵa qonys aýdaryp, keıin kóship ketken turǵyn endi 5,2 mln teńgeni úsh aı ishinde qaıtarýy tıis
PETROPAVL. KAZINFORM – Soltústik Qazaqstan oblysynda Aqjar aýdandyq mansap ortalyǵy men óńirge qonys aýdarýshy sottasty.
Jaýapker T. óńirge «Eńbek» memlekettik baǵdarlama aıasynda qonys aýdarǵan. SQO sotynyń málimetinshe, ol Aqjar aýdandyq mansap ortalyǵymen memlekettik qoldaý kórsetý týraly áleýmettik kelisimshartqa otyrady.
Baǵdarlama sharttaryna sáıkes qonys aýdarýǵa sýbsıdııa otbasynyń árbir múshesine 70 AEK mólsherinde beriledi. Osyǵan baılanysty jaýapkerge 1,2 mln teńge tólengen. Sonymen qatar jaýapkerdiń ekonomıkalyq utqyrlyq sertıfıkatyn alý týraly ótinishine baılanysty taǵy 4 mln teńge berildi.
Áleýmettik kelisimshart talaptaryna sáıkes, baǵdarlamaǵa qatysýshy otbasymen birge qonys aýdarý ornynan ketken jaǵdaıda, alynǵan sýbsıdııalar somasy 60 aı ishinde respýblıkalyq bıýdjetke qaıtarylýy tıis. Sottalýshy óńirden kóship ketken.
Ortalyq T.-ǵa bıýdjet qarajatyn óz erkimen qaıtarý týraly habarlama joldaǵan. Sottalýshy eshqandaı shara qoldanbaǵan. Bıýdjet qarajaty qaıtarylmaǵan.
Sol sebepti talapker jaýapkerden respýblıkalyq bıýdjet esebinen 5,2 mln teńge qarajatty óndirýdi surap, talap aryzben júgindi. Іsti sot talqylaýyna daıyndaý barysynda taraptar tatýlasyp, bitimge keldi.
Endi bitimgershilik kelisim boıynsha jaýapker 3 aı ishinde teń úlestermen memleketten alǵan aqshany qaıtarýy tıis.
Esterińizge salaıyq, SQO bıyl 3 144 qonys aýdarýshyny qabyldaıdy.