SQO-ǵa qonys aýdarǵan fermerler jeńildikpen berilgen nesıeni qaıtarmasa sotqa tartylýy múmkin
PETROPAVL. KAZINFORM - Soltústik Qazaqstan oblysyna ońtústik óńirlerden qonys aýdaryp, mal sharýashylyǵymen aınalysyp jatqan úsh otbasyǵa 13,8 mln teńgeni qaıtarý talap etilgen.
SQO Kásipkerler palatasynyń málimetinshe, «Bahadır», «Tileýjan» jáne «Sabohat» jeke kásipkerleri 2023 jyly memlekettik baǵdarlama aıasynda mal sharýashylyǵyn damytýǵa jeńildetilgen nesıe alǵan. Alaıda keıin memlekettik aýdıt maldy satý jáne soıý faktilerin anyqtap, muny bıýdjet qarajatyn maqsatsyz paıdalaný retinde baǵalaǵan. Osyny negizge alǵan «Soltústik» áleýmettik-kásipkerlik korporatsııasy kásipkerlerden jalpy somasy 13,8 mln teńge nesıeni tolyq kólemde merziminen buryn qaıtarýdy talap etken.
Kásipkerler bul sheshimmen kelispeıdi. Olardyń aıtýynsha, nesıe shartynda kórsetilgen negizgi talap tolyq oryndalǵan. ıAǵnı, qarjy alynǵannan keıin belgilengen merzim ishinde mal satyp alynyp, qarajattyń maqsatty jumsalǵany barlyq tıisti qujattarmen rastalǵan. Keıin ýaqyt óte kele sharýashylyqtar maldyń bir bóligin satqan nemese soıǵan.
Qonys aýdarýshy Bahadır Ismatýllaev bes jyl buryn Shymkentten Soltústik Qazaqstan oblysyna kóship kelgen. Memlekettik qoldaý aıasynda oǵan 8,6 mln teńge jeńildetilgen nesıe berilip, ol qarajatqa 13 jylqy satyp alǵan. Sharýashylyǵyn damytýdy josparlaǵan Bahadır óńirdiń qatal qysyna daıyn bolmaı, jeti jylqysy qyrylyp qalǵan. Keıin qalǵan jylqysyn satyp, ornyna iri qara mal alǵan.
Fermerdiń aıtýynsha, búginde olardyń sharýashylyǵynda 50 bas iri qara bar. Ol óziniń bul óńirge ýaqytsha paıda tabý úshin emes, turaqtap, mal sharýashylyǵyn damytý úshin kelgenin atap ótti.
- Malymdy satyp, nesıemdi jaýyp, ońtústikke qaıta kóship ketýime bolatyn edi. Biraq meniń maqsatym basqa. Osy jerde eńbek etip, sharýashylyǵymdy keńeıtkim keledi, - deıdi ol.
SQO Kásipkerler palatasynyń ókilderi fermerlerdiń ýájimen kelisedi. Mamandarynyń pikirinshe, nesıe qarajaty maqsatty paıdalanylǵany dáleldengennen keıin maldy ótkizýdi nemese soıýdy zańbuzýshylyq retinde qarastyrý durys emes. Onyń ústine kásipkerler nesıelerin ýaqytyly tólep keledi. Mal sharýashylyǵynyń basty maqsaty - et pen sút óndirý arqyly tabys tabý. Sondyqtan maldy satý nemese soıý qalypty óndiristik protsess. Buǵan qosa, qoldanystaǵy aýyl sharýashylyǵy salasyndaǵy normatıvtik qujattarda ósirilgen maldy ótkizýge tyıym salynbaǵan.
«Soltústik» ÁKK ókili Talǵat Jumabekovtyń aıtýynsha, nesıe 7 jylǵa beriledi. Buryn fermerdiń nesıe sharttaryn oryndap, ýaqtyly tólem jasaýy jetkilikti bolǵan. Endi bıyldan bastap talap ózgerdi, bastapqy satyp alynǵan mal basy nesıe ýaqyty aıaqtalǵansha azaımaýy tıis.
- 2024 jyly bizge revızııalyq komıssııa tekserý júrgizip, satyp alynǵan maldyń soıylǵanyn anyqtady. Biz qarsylyǵymyzdy bildirdik jáne keıin komıssııa bizdiń ýájimizben kelisti. Biraq ótken jyly oblysqa Joǵary aýdıtorlyq palata tekserýmen kelip, revızııalyq komıssııanyń qorytyndysyn joqqa shyǵardy. Bizge qaryz alýshylardan qarajatty tolyq kólemde qaıtarýdy talap etip, sotqa júginý jóninde nusqama berildi, – deıdi Talǵat Jumabekov.
Eger másele sotqa jetse, SQO Kásipkerler palatasynyń zańgerleri qonys aýdarǵan sharýalardyń múddesin qorǵaýǵa daıyn ekenin málimdedi.
Buǵan deıin ońtústikten SQO-ǵa qonys aýdarǵandardyń turmysy týraly jazǵan edik. 2016 jyldan beri oblysqa 19 myń adam, ıaǵnı 5300-den astam otbasy kóship kelgen.
