SQO-ǵa kómekke Taraz qalasynan 30 qutqarýshy keldi
PETROPAVL. QazAqparat - Ótken táýlikte SQO-da bir de bir turǵyn úıdi sý basqan joq. Al Sh.Ýálıhanov aýdanynda sý deńgeıi túse bastady, dep habarlaıdy QazAqparat tilshisi.
Alaıda, óńirdiń úsh aýdanynda jergilikti mańyzy bar joldardyń 10 ýchaskesin sý shaıyp ketti. Oblystyq Tótenshe jaǵdaı departamenti mamandarynyń málimetinshe, Ǵ.Músirepov, Aqjar jáne Sh.Ýálıhanov aýdandaryndaǵy joldardy sý basyp qalǵan. 10 ýchaskeniń toǵyzynda avtokólikterdiń ótýine jaǵdaı jasalǵan. Al Ǵ. Músirepov aýdanyndaǵy Chıstopole aýylyna barar jol ýaqytsha jabylǵanymen, eldi mekenmen baılanys úzilgen joq.
Qutqarýshylardyń aıtýynsha, qazirgi ýaqytta 3 beket qoıylǵan. Olardyń biri Qaratal aýylynyń mańynda, turǵyndardy Qýlykól eldimekenine jetkizýmen aınalysty. Ekinshisi 13-sý ótkizý qurylysynyń janynda ornalasyp, tótenshe jaǵdaı qyzmetiniń mamandary muz kesse, úshinshisi Segiz kóz sý ótkizý qurylysynyń mańynda sý deńgeıin baqylaıdy.
Jaǵdaıdy baǵalaý úshin Aqqaıyń, Aqjar jáne Taıynsha aýdandarynyń aýmaǵy tikushaqpen qaraldy. Qaýipti aımaqtardan 100 qoı-eshki kóshirildi.
Al 2 sáýirde kúni Jambyl oblysynan Esil aýdanyna 30 adam men 5 tehnıka jetkizildi. Tarazdyq qutqarýshylardyń maqsaty - oblys aýmaǵynda tasqyn sýdyń aldyn alýǵa kómektesý.
