SQO-ǵa kóktemgi dala jumystaryna jeńildetilgen baǵamen 53,2 myń tonna dızel bólindi
PETROPAVL. KAZINFORM – Soltústik Qazaqstan oblysynda kóktemgi dala jumystaryna daıyndyq júrip jatyr. Bıyl óńirde 4,5 mln ga alqapqa daqyl egilmek. Azyq-túlik qaýipsizdigin qamtamasyz etý úshin kartop pen qaraqumyq alqaby ulǵaıtylady.
SQO aýyl sharýashylyǵy jáne jer qatynastary basqarmasy baspasóz qyzmetiniń málimetinshe, Memleket basshysynyń 2024-2028 jyldary aýyl sharýashylyǵy jalpy óniminiń kólemin 2 esege ulǵaıtý jónindegi tapsyrmasyn oryndaý maqsatynda Jol kartasy ázirlengen.
Bıyl egis alańy 4,5 mln ga, onyń 3,4 mln ga dándi jáne dándi-burshaqty daqyl, 751 myń ga maıly daqyl jáne 379 myń ga jemshóp egilmek.
«Azyq-túlik qaýipsizdigin qamtamasyz etý jáne ishki naryqty áleýmettik mańyzy bar ónimdermen toltyrý úshin qaraqumyq alqaby 26 myń gektarǵa, kartop 7,7 myń gektarǵa deıin ulǵaıtylady. Jaqsy ónim alý úshin mıneraldy tyńaıtqyshtardy paıdalaný kórsetkishi de artpaq. Byltyr 2,6 mln ga alqapqa 190,2 myń tonna qoldanylsa, bıyl shamamen 256 myń tonna mıneraldy tyńaıtqyshtar engizý josparlanǵan. Bul el boıynsha qoldanylatyn tyńaıtqyshtardyń jalpy kóleminiń shamamen 30%», — deıdi basqarma basshysy Meıram Meńdibaev.
Qazirgi ýaqytta kóktemgi egiske tehnıka 90% daıyn.
«Memleket kóktemgi dala jumystaryna 53,2 myń tonna dızel otynyn bóldi, onyń 6 myń tonnasy aqpan aıyna keldi. Qalǵany kezeń-kezeńmen mamyr aıynyń ortasyna deıin jetkiziledi. Dıqandar úshin dızel otynynyń baǵasy — lıtrine 250 teńge. Qazgıdromettiń derekteri boıynsha 2023 jyly topyraqtaǵy ylǵaldyń qory 99 mm nemese 147%, norma — 69 mm. Qańtar aıynda jaýyn-shashyn 29,2 mm nemese normadan eki ese kóp jaýdy. Ylǵal qory jetkilikti», — deıdi Meıram Meńdibaev.
