SQO-ǵa kelgen katolıkter qazaq beınesindegi ıkonaǵa minájat etedi

Bıyl 90 jyldyǵyn atap ótken aýyldy 1936 jyly jer aýdarylǵan polıaktar negizin qalaǵan. Búginde munda olardyń urpaqtary turyp jatyr. Leontına Korchınskaıanyń ata-anasy da Ýkraınadan kúshtep kóshirilgenderdiń qatarynda bolǵan. Aıtýynsha, sol kezde ákesi 18-de, anasy 16 jasta ǵana eken.

— Áke-sheshemiz aıtyp otyratyn, jergilikti halyq — qazaqtar kóp kómektesti dep. Aýyr jyldar boldy. Meniń joldasymnyń áke-sheshesi de ýkraınalyq polıaktar. Qazir biz de seksennen astyq.

1967 jyly Vladıslavpen shańyraq kóterdik. Biz bir aýylda turdyq, basynda jaqsy dos boldyq. Aǵam bolǵandyqtan bizge qonaqqa jıi keletin, qyzdar týraly suraıtyn. Men oǵan qaı qyz jaqsy, qaı jerde qandaı qalyńdyq baryn aıtyp, keńes beretinmin. 11-synypty bitirgennen keıin ınstıtýtqa syrttaı oqýǵa tústim. Anam jalǵyz, kómektesý kerek boldy. Mektepte muǵalim bolyp istep júrip, Vladıslavqa turmysqa shyqtym. Keler jyly 60 jyl shańyraq kótergenimizge, aman-esen sol kúnge jetkizsin! — deıdi Leontına Korchınskaıa.

Aýyl mańyndaǵy Ozernoe kóliniń tarıhy tańǵajaıyp oqıǵamen baılanysty. Turǵyndardyń aıtýynsha, ashtyq jaılaǵan 1941 jyly erigen qar sýynan kól, keıin balyq paıda bolady. Osylaısha jer aýdarylǵan halyqty ajaldan arashalap qalǵan desedi. 1997 jyly maýsym aıynda asharshylyqtan aman alyp qalǵan kólge degen alǵystyń belgisi retinde Marııanyń músini ornatyldy. Búginde bul jer katolıkter úshin qasıetti zııarat ornyna aınalǵan.

Munda Qazaqstannyń kıeli oryndarynyń qataryna engen «Beıbitshilik patshaıymy» ǵıbadathanasy bar. 1990 jyly turǵyndardyń bastamasymen boı kóterdi. Onyń basty qundylyǵy — álemdegi sanaýly «Beıbitshilik altarynyń» biri — «Qazaqstan juldyzy» ornalasqan.

— «Beıbitshilik patshaıymy» ǵıbadathanasynda ornalasqan «Qazaqstan juldyzy» altarinde Isa paıǵambardyń denesiniń bólshegi salynǵan saýyt bar. Biz oǵan kúni boıy tańǵy saǵat 10.00-den bastap, keshki saǵat 18.00-ge deıin syıynamyz. Bul ǵıbadathanada únemi bir adam kezekshilik etip, olar minájat etedi. Kezekshilik qurylǵan. Ár eki saǵat saıyn aýysyp otyrady, almastyrǵansha deıin ketpeıdi, ıaǵnı altardyń aldy bos bolmaıdy. Syıynýǵa tilek bildirýshilerdiń tizimi bir aıǵa jasalyp qoıǵan.

Adamdar bul jerde dúnıe júzinde beıbitshilik bolýy úshin Qudaıdan suraıdy. Altarlardy ornatýdaǵy ıdeıa da osy edi, álemge tynyshtyq tileý.

Bul — álem boıynsha josparlanǵan on eki Beıbitshilik altarynyń ekinshisi. Jalpy qazir olardyń segizi qoıylǵan. Keı altarlardyń aldynda qulshylyq etý bir sát toqtamaıdy, kúni-túni adamdar minájat etedi. Biraq biz shaǵyn eldi meken, halyq sany az bolǵandyqtan, ol múmkin emes, — deıdi ǵıbadathana qyzmetkeri Rafala Kısel.

Altardy polıak sheberi Marıýsh Drapıkovskıı altynnan, tıtannan jáne asyl tastardan jasaǵan. Betinen qazaqtyń ulttyq oıý-órnekterin de kórýge bolady. Altardyń uzyndyǵy — 7,5, eni — 2,5 metr, salmaǵy — 600 kg. Ozernyı aýylyna ol 2014 jyly ákelinip qoıyldy.

— Bul joba boıynsha jer sharyn tolyq qamtyp, minájat etý tizbegin qurý. Osyndaı 12 oryn bolýy tıis. Bul rýhanı baılanys úzilmeı, dúnıejúzinde beıbitshilik bolýyn tileıdi.

Altardy kez-kelgen jerge qoımaıdy. Ol oryn Qudaı anamen baılanysty qasıetti oryn jáne basynan qıynshylyq — soǵys, asharshylyq ótkizgen el bolýy tıis. Óıtkeni olar beıbitshiliktiń qadirin jaqsy túsinip, sol úshin syıynatyn bolady.

Altardyń birinshisi Ierýsalımde paıda boldy, biraq, qaqtyǵystardan keıin, ol jerde syıynatyn adam bolmaı, Palestınadaǵy qasıetti jer — Vıfleemge kóshirdi, — deıdi ǵıbadathana qyzmetkeri.

Úshinshisi — Bosnııa jáne Gertsegovınada, 12 altar ıdeıasynyń avtory Petr Cholkevıchtiń týǵan jerinde qoıyldy. Afrıkada ekeýi — Kot-d’Ivýar jáne Rýandada, Fılıppınde, Ońtústik Koreıada, sondaı-aq Polshada tur.

Ozernyıdaǵy taǵy bir erekshe nysan — kıiz úı pishininde salynǵan biregeı ǵıbadathana. Munda qazaq áıeliniń beınesi beınelengen «Uly Dala Anasy» ıkonasy saqtaýly.

— Qudaı ana Isa paıǵambarmen birge qazaq beınesinde salynǵan. Álemniń túkpir-túkpirindegi kóptegen etnos katolık dinin ustanady. Olardyń barlyǵy Qasıetti Marııany ózderiniń rýhanı anasy retinde qabyldaıdy. Eger Afrıkada Marııa afrıkalyq, al Qytaıda qytaılyq áıel beınesinde beınelense, nege Qazaqstanda ol qazaq anasy retinde kórsetilmeske?

«Uly Dala Anasy» dep atalatyn ıkonany jergilikti sýretshi Dosbol Qasymov saldy. 2022 jyly ony Rım Papasy Frantsısk Qazaqstanǵa sapary kezinde dáriptep, qasıetti etti.

Onyń birneshe ereksheligi bar. Sonyń biri — qazaqtarda jas áıel adam betine tike qaramaıdy. Bul qarapaıymdylyqtyń kórinisi. Munda sol dástúr eskerilgen. Sondaı-aq, Márııam men Isa kıiz úıdiń ishinde otyr, — deıdi Rafala Kısel.
Al aýyldan 12 shaqyrym jerde Volıanskaıa shoqysynda 1998 jyly 12 metrlik belgi qýǵyn-súrgin qurbandarynyń eske alý maqsatynda qoıyldy.

Buǵan deıin SQO-da polıaktar kóp qonystanǵan eldi mekende «Qazaq halqyna alǵys» estelik belgisi qoıylǵanyn jazǵan edik.