SQO-ǵa keletin sheteldik týrıster sany úsh ese artqan
SQO qoǵamdyq keńesinde óńirdiń týrızm áleýeti talqyǵa tústi. Kásipkerlik jáne ındýstrıaldy-ınnovatsııalyq damý basqarmasynyń týrızmdi damytý jáne lıtsenzııa bóliminiń basshysy Qanat Shamsýtdınovtyń aıtýynsha, qazir Imantaý-Shalqar kýrorttyq aımaǵynda 42 demalys orny jumys isteıdi, onyń 10-y qonaqtardy jyl boıy qabyldaı alady. Demalys sapasyn arttyrý úshin jylda materıaldyq-tehnıkalyq bazasy jańartylyp, kórsetiletin qyzmet sany artyp keledi.
«Shalqar kólinde sýda qutqarý postyn salý úshin 18,7 mln teńgege onyń jobalyq-smetalyq qujaty ázirlendi. Qurylysy keler jyly bastalady. «Transtelekom» AQ osy aımaqta uıaly baılanys pen ınternet sapasyn arttyrý úshin 6 antenna-machta qurylysyn ornatady. Qazir qujaty ázirlenip jatyr. Jalpy, jyl basynan SQO-da týrızm salasyna 5,56 mlrd teńge ınvestıtsııa tartylsa, sonyń 1,2 mlrd teńgesine 7 joba osy kýrorttyq aımaqta júzege asyrylady», - deıdi Qanat Shamsýtdınov.
Mamannyń aıtýynsha, joba aýqymdy. Buǵan deıin qolbaılaý bolǵan másele sheshildi, endi ınvestorlar iske kirispek.
«Kókshetaý» memlekettik ulttyq tabıǵı parkiniń bas jospary uzaq ýaqyt bekitilmeı, biz de kýrorttyq aımaqqa ınvestorlardy tarta almadyq. Byltyr bas joba qabyldandy. Qazirgi ýaqytta kásipkerler zamanaýı eko-otel, glempıng, avtokaravanıngterdiń qurylysyn júrgizý úshin jobalyq-smetalyq qujattar ázirlenip jatyr. Investıtsııa – shamamen 4,5 mlrd teńge», - deıdi bólim basshysy.
Jol máselesi de birtindep sheshilip jatyr. Sońǵy bes jylda munda 8 mlrd teńgege 250 km jol jóndeldi.
«Byltyrdan bastap týrızm salasynda memlekettik qoldaý sharalary bar. Máselen, týrıstik qyzmet nysandaryn jáne jol boıyndaǵy servıs obektilerin salý nemese rekonstrýktsııalaý kezindegi shyǵyndardyń 10%-y, týravtobýstardy satyp alý qunynyń 25%-y qaıtarylady. Sanıtarııalyq-gıgıenalyq toraptardy ustaýǵa jumsalǵan shyǵyndardyń bir bóligi úshin kásipkerlerge aı saıyn 83 300 teńge kóleminde óteımiz», - deıdi Qanat Shamsýtdınov.
Bıylǵy birinshi toqsanda óńirge 24,2 myń týrıst kelgen, onyń 2,1 myńy – sheteldik. Shekara asyp kelgen demalýshylardyń sany úsh ese ósip otyr.
