SQO-ǵa qajetti 77 dáriger bıýdjet esebinen oqytylyp jatyr
PETROPAVL. QazAqparat – Soltústik Qazaqstan oblysynda kadr jetispeýshiligi máselesin sheshý maqsatynda bıyl alǵash ret 77 dárigerdi rezıdentýrada oqytýǵa jergilikti bıýdjetten qarajat bólindi, dep habarlaıdy QazAqparat tilshisi.
SQO-da 10 aıdy qorytyndylaǵan ákimdik otyrysy ótti. Óńirdiń densaýlyq saqtaý salasynda oń ózgerister bar. Bıylǵy 10 aıda ana ólimi tirkelgen joq. Bala ólimi 20 paıyzǵa qysqardy. 11 paıyzǵa qan aınalymy aýrýlarynan ólim kórsetkishi azaıǵan.
Oblys ákiminiń baspasóz qyzmetinen málim etkendeı, bıyl 3,8 mlrd teńgege medıtsınalyq qondyrǵylar jańǵyrtylýda. Jyl sońyna deıin oblystyq aýrýhanaǵa 549 mln teńge turatyn MRT apparaty keledi. Jańa angıograf ta alynady.
«Aýdandyq aýrýhanalarǵa 4 mammograf alynady. Onkologııalyq ortalyqqa tsıfrlyq mammograf qoıyldy, ol obyrdy bastapqy kezeńde anyqtaıdy. Jyl sońyna deıin 13 reanımobıl keledi», - dedi aımaq ákimi Qumar Aqsaqalov.
Kadr tapshylyǵy máselesi de sheshilip jatyr. Bıyl oblys 98 dárigerdi qabyldady. Byltyr 56 maman kelgen edi. Nátıjesinde kadr tapshylyǵyn 220-ǵa deıin azaıtýǵa múmkin boldy.
Jyl basynan kelgen 53 dárigerge 1,5 mln teńgeden jalpy somasy 79,5 mln teńge kótermeaqy berildi. Óńirge asa qajet 77 mamandy rezıdentýrada oqytyp shyǵarý úshin oblys bıýdjetinen 40,4 mln teńge bólindi.
