SQO-ǵa Qaraǵandyda shyǵarylǵan «Spýtnık V» vaktsınasy jetkizilmek
SQO-nyń bas sanıtar dárigeri Áset Jumataev óńirdegi koronavırýs boıynsha jaǵdaıdy brıfıngidete aıtyp berdi.
«Qańtar aıynyń ortasynan bastap oblysta koronavırýs juqtyrǵandar sany ósip, kúnde ortasha 100-110 jaǵdaıdan tirkelip otyrdy. Osyǵan baılanysty karantındik shekteýlerdi qatańdatýǵa týra keldi. Nátıjesinde epıdjaǵdaı turaqtalyp otyr. Ótken aptamen salystyrǵanda aýyrǵandar sany 1,5 esege azaıǵan. Qazir táýligine jańadan orta eseppen 60-62 jaǵdaı tirkeledi. SQO – «sary aımaqqa» kirdi», - dedi Áset Jumataev.
Máselen ótken táýlikte SQO-da 68 adamda KVI anyqtalǵan. Qazir juqtyrǵandardyń jalpy sany – 11 568.
Aýyrǵandar sanynyń azaıýyna baılanysty 13 aqpannan bastap óńirde bas sanıtar dárigerdiń jańa qaýlysy kúshine enedi.
«Birqatar nysannyń jumys isteýine ruqsat berdik. Karantın talaptaryn jeńildetý – oblystan vırýs ketti degen sóz emes. Ol bizdiń qasymyzda. Kez kelgen ýaqytta juqtyrýymyz múmkin. Sol sebepti barlyǵyn sanıtarııalyq talaptardy oryndaýǵa shaqyramyn. Maska taǵý, áleýmettik ara qashyqtyqty saqtaý, halyq kóp júretin jerlerge barmaý, qoldy jıi jýý – kúndelikti ádetke aınalǵany jón. Sondaı-aq qaýipti vırýstan saqtanýdyń taǵy bir tıimdi joly – vaktsına alý. Vaktsına qoıýǵa shaqyrǵan jaǵdaıda odan bas tartpaı, egilińiz. Bul óz basyńyzdy ǵana emes, jaqyndaryńyzdyń da densaýlyǵyn saqtaýǵa kómektesedi», - dedi SQO-nyń bas sanıtar dárigeri.
Mamannyń aıtýynsha, oblysqa aqpan aıynyń ekinshi jartysynda Qaraǵandydaǵy farmatsevtıkalyq keshende shyǵarylǵan «Spýtnık V» vaktsınasy jetkiziledi. Vaktsına tegin salynady.
SQO densaýlyq saqtaý basqarmasy baspasóz qyzmetiniń málimetinshe, búginge deıin 1025 adam koronavırýsqa qarsy vaktsına aldy. Ekpe egilgenderdiń jaǵdaıy jaqsy.
