SQO-ǵa ımporttalatyn 12 túrli sút ónimi kúsheıtilgen zerthanalyq baqylaýdan ótkiziledi
PETROPAVL. KAZINFORM – Soltústik Qazaqstan oblysynda azyq-túlik qaýipsizdigin qamtamasyz etý maqsatynda bıyl veterınarııalyq-sanıtarlyq saraptama zerthanalary 233 myńǵa jýyq zertteý júrgizdi. Nátıjesinde sapasyz dep tanylǵan 350 kg taýar joıyldy.
SQO veterınarııa basqarmasynyń málimetinshe, et jáne et ónimderi, sút jáne sút ónimderi, jumyrtqa, balyq, qus eti, bal tekseriledi.
Budan bólek azyq-túlik qaýipsizdigin qamtamasyz etý maqsatynda osy jyldyń 5 aıynda 405 monıtorıngtik zertteý júrgizilgen. Bul - jalpy jyldyq jospardyń 40%. Ónimder radıologııaǵa, mıkrobıologııaǵa, parazıtologııaǵa, ýly elementterge, dıoksıdterge tekserilip, adam aǵzasyna qaýipti zattar anyqtalmady.
Tamaq ónimderiniń qaýipsizdigin qamtamasyz etý maqsatynda barlyq ishki saýda nysandaryna veterınarııalyq-sanıtarlyq ınspektorlar bekitilgen. Mamandar jetkizilgen ónimderdiń talapqa saı qujaty bolýyna monıtorıng júrgizedi. Barlyq ónim bazar sórelerine asa qaýipti aýrýlar boıynsha, sondaı-aq veterınarııalyq-sanıtarııalyq saraptamadan ótkennen keıin ǵana qoıylady.
Jaýapty memlekettik organdardyń qatysýymen bıyl 146 reıd júrgizildi, 89 zańbuzýshylyq anyqtaldy, 3,1 mln teńge somasyna 74 ákimshilik aıyppul salyndy.
Bıyl 64 472 tonna júk artylǵan 5 myńǵa jýyq kólik veterınarlyq tekserýden ótti. Kórshi memleketten 2 myńǵa jýyq mal jáne 3 mln astam qus jetkizilgen. Alaıda 58 kólik ıesi tıisti talaptardy saqtamaǵandyqtan Reseıge qaıtaryldy. 33 quqyq buzýshy ákimshilik jaýapkershilikke tartylyp, olarǵa 1,2 mln teńge shamasynda aıyppul salyndy.
«QR Densaýlyq saqtaý mınıstrliginiń sanıtarııalyq-epıdemıologııalyq baqylaý komıteti memlekettik azyq-túlik monıtorıngin júrgizý barysynda ımporttyq sút ónimderiniń 12 ataýynyń quramyndaǵy sáıkessizdikterdi anyqtady. Osyǵan baılanysty Veterınarııalyq baqylaý jáne qadaǵalaý komıteti Keden odaǵynyń tizilimindegi osy taýarlardy óndirýshi kásiporyndardyń mártebesin ózgertti, endi olardyń ónimderi kúsheıtilgen zerthanalyq baqylaýdan ótkizilip otyrady», - deıdi mamandar.
Buǵan deıin SQO-da qaıtys bolǵan eki búldirshinniń nıtrıtten ýlanǵanyn jazǵan edik.
