SQO-ǵa bıyl ońtústik óńirlerden shamamen 2,5 myń adam kóship keledi

PETROPAVL. QazAqparat – Soltústik Qazaqstan oblysyna byltyr elimizdiń eńbek kúshi artyq óńirlerinen 1 800-ge jýyq adam qonys aýdarsa, sonyń 96% jumyspen qamtyldy, dep habarlaıdy QazAqparat tilshisi.

SQO jumyspen qamtýdy úılestirý jáne áleýmettik baǵdarlamalar basqarmasy ótken jyldy qorytyndylady.

Basqarma basshysy Almaz Qoshmanovtyń aıtýynsha, byltyr óńirde 30 myńǵa jýyq adam jumysqa ornalasqan. Onyń 13 myńy jańadan ashylǵan.

«Byltyr óńirde «Eńbek» memlekettik baǵdarlamasyna oblystyń shamamen 24 myń turǵyny qatysty. 542 jumyssyz adam eńbek naryǵynda suranysqa ıe mamandyqtarǵa qaıta oqytyldy. 938 adam «Bastaý bıznes» kýrsyna qatysyp, kásipkerlik negizderimen tanysty. Óz isin ashýǵa nıet etkenderge 3 mlrd 671 mln teńgege 2 295 nesıe men grant berildi», - deıdi Almaz Qoshmanov.

2021 jyly QR Premer-Mınıstri men oblys ákimi arasynda jasalǵan memorandým aıasynda SQO-da 26 myń adamdy jumysqa ornalastyrý jáne 12 myń jańa turaqty jumys ornyn qurý josparlanǵan.

Óńirdegi mamandarǵa degen qajettiliktiń ornyn toltyrý maqsatynda bıyl da oblysta elimizdiń eńbek kúshi artyq óńirlerinen azamattardy qabyldaý jumystary jalǵasady.

Byltyr SQO negizinen ońtústik óńirlerden 590 otbasy, ıaǵnı 1765 adamdy qabyldady.

Onyń basym bóligi jumys kúshine aıtarlyqtaı suranys bar aýyldyq jerge kóshirildi.

Eńbekke qabiletti azamattardyń shamamen 96 %-y jumyspen qamtylǵan. Bıyl oblys shamamen 2,5 myń adamdy qabyldaýdy josparlap otyr.

«Az qamtylǵan otbasylar da únemi nazarda. Byltyr 2485 otbasyna, onyń ishinde 6743 balaǵa ataýly áleýmettik kómek kórsetildi. 1-6 jasqa deıingi balalarǵa kepildik berilgen áleýmettik toptama ótken jyldyń qorytyndysy boıynsha 2552 búldirshinge berildi. Bıyl ataýly áleýmettik kómekpen 8 300 adamdy nemese 1851 az qamtylǵan otbasyny, kepildi áleýmettik paketpen 2233 balany qamtý josparlanǵan», - deıdi basqarma basshysy.

Qazirgi ýaqytta oblysta 26 myńnan astam múgedek adam esepte tur.

2021 jyldan bastap qyzmetter men quraldarmen qamtamasyz etý áleýmettik qyzmetter portaly arqyly ǵana júrgiziledi, ol arqyly 8 myńnan astam tapsyrysty qamtý josparlanyp otyr.

«Tótenshe jaǵdaı jáne karantın kúsheıtilgen kezde ýaqytsha jumyssyz qalǵan azamattarǵa 42 500 teńgeden 158 myń tólem jasaldy. Azyq-túlik-turmystyq jıyntyǵyn satyp alý úshin 35 125 adamǵa 2 AEK mólsherinde tólem júrgizildi. «Biz birgemiz» naýqany aıasynda 23 761 adam 50 myń teńge kóleminde materıaldyq kómek aldy», - deıdi SQO jumyspen qamtýdy úılestirý jáne áleýmettik baǵdarlamalar basqarmasynyń basshysy Almaz Qoshmanov.