SQO-ǵa bıyl Nur-Sultan qalasynan 100 otbasy kóship keldi
PETROPAVL. QazAqparat – Soltústik Qazaqstan oblysyna ońtústiktegi «jumys kúshi artyq» oblystardan mamandardy tartý baǵdarlamasy aıasynda kóship kelýshilerge 2020 jylǵa deıin 2100 turǵyn úı salynady, dep habarlaıdy QazAqparat tilshisi.
SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, sońǵy úsh jylda Qyzyljar óńirine jumys kúshi artylǵan óńirlerden 5 myńǵa jýyq adam – 1428 otbasy qonys aýdarǵan. Onyń ishinde 725 úıelmen bıyl kelgender. Oblysqa osy jyly kóshkenderdiń 50%, ıaǵnı 1085 adam eńbekke jaramdy bolsa, solardyń 73% turaqty jumysqa ornalastyryldy.
«Oblysqa mamandar kerek. Qazir halyqtyń 19% zeınet jasyndaǵy adamdar. Bul – 103 myń adam. Óńir turǵyndary qartaıyp jatyr. Jumys berýshiler ózderine qajet mamandardy tabý úshin ońtústik oblystarǵa baryp, turǵyndarmen kezdesip, shaqyryp jatyr», - deıdi SQO ákiminiń orynbasary Asqar Saqypkereev.
Kóship kelgenderdi jergilikti bılik jumysqa, balalaryn kezeksiz balabaqshaǵa ornalastyrady. «Kásip ashamyn, jer alyp, baý-baqshamen aınalysamyn» degenderge de bar jaǵdaı jasalady. Jer ýchaskeleri berilip, granttar úlestirilip jatyr. Qonys aýdarýshylardyń basty máselesi – turǵyn úı. Áleýmettik-ekonomıkalyq damý keshendi jospary aıasynda óńirde qonys aýdarýshylarǵa baspana salý boıynsha pılottyq joba júzege asyrylyp jatyr. Bıyl qolǵa alynǵan tyń bastama nátıjesinde 428 úıdiń qurylysy bastaldy. Bes úlgi boıynsha salynatyn baspanalardyń jalpy aýdany 90 sharshy metrge deıin bolmaq.
Oblystaǵy sharýashylyqtar da qarap qalmaı, kóship kelgen mamandardy baspanamen qamtyp jatyr. Ǵ.Músirepov aýdanyndaǵy «Aqseleý» JShS basshysy Serik Malaev qonys aýdarýshylarǵa 10 úı salyp berdi. Gúlmıra Joldaspaeva otbasymen birge jeti jyl Nur-Sultan qalasynda páter jaldap turǵan. Qazir jas maman mektepte aǵylshyn tilinen sabaq beredi.
«Aýylǵa kóship kelgenime esh ókinbeımin. Bıyl qyrkúıek aıynda memlekettik baǵdarlamamen Kovylnoe aýylyna keldik. Eki balamyz bar. Kúıeýim «Aqseleý» JShS jumys isteıdi. Úıimiz jyly, jaıly. Qaladan aýylǵa kóship kelgenime esh ókinbeımin», - deıdi Gúlmıra Joldaspaeva.
SQO-ǵa tek Nur-Sultan qalasynan ǵana bıyl 100 otbasy qonys aýdarǵan. Óńirge kóship kelýshilerge tek pılottyq joba aıasynda ǵana 2022 jylǵa deıin 2100 baspana salynbaqshy.
