SQO-ǵa Astananyń ulttyq mýzeıinen 100 kartına ákelindi
PETROPAVL. QazAqparat - Soltústik Qazaqstan oblysynda Astana qalasynyń mádenı kúnderi ótip jatyr, dep habarlaıdy QazAqparat tilshisi.
Atalmysh shara aıasynda «Aq tilekpen Astana» atty kórme ótti. Oǵan elordadan qazaqstandyq sýretshilerdiń úzdik 100 týyndysy ákelindi.
Óńirlik kommýnıkatsııalar qyzmetiniń habarlaýynsha, «Aq tilekpen Astana» shyǵarmashylyq jobasy jas elordanyń álemniń qarqyndy damyp kele jatqan astanalarynyń biri retinde ondaǵy sýret óneriniń damýyn kórsetýge baǵyttalǵan. 
Astana qalasy mádenıet pen sport basqarmasy basshysynyń orynbasary Narıma Muhambetalınanyń aıtýynsha, kórmege 50-den astam sýretshilerdiń stıli men dáýiri bir-birine uqsas emes týyndylary qoıylǵan.
«Biz Soltústik Qazaqstan oblysyna qyzyqty mádenı baǵdarlama alyp keldik. Kórmeden bólek, soltústikqazaqstandyq turǵyndar Astananyń shyǵarmashylyq ujymdarynyń qatysýymen ótetin «Astanadan aq tilek» atty gala-kontsertti tamashalaı alady. Jas kórermender úshin elordalyq qýyrshaqtar teatry «Máńgilik bala beıne» qoıylymyn sahnalaıdy. Beısenbi kúni keshke Open air kontserti ótedi», - dep bólisti N.Muhambetalına.
