SQO-ǵa 314-shi atqyshtar dıvızııasynyń jaýyngerlik týy jetkizildi

PETROPAVL. QazAqparat – Soltústik Qazaqstan oblysyna 1941 jyly Petropavlda qurylǵan 314-shi atqyshtar dıvızııasynyń jaýyngerlik týynyń kóshirmesi jetkizilip, oblystyq tarıhı-ólketaný mýzeıine tapsyryldy, dep habarlaıdy QazAqparat tilshisi.

Jeńistiń 75 jyldyq mereıtoıyn joǵary deńgeıde atap ótý úshin elimizde«Ata-baba rýhyna laıyqty bolamyz» atty respýblıkalyq patrıottyq aktsııasy ótip jatyr. Uly Otan soǵysy jyldary Qazaqstannyń aýmaǵynda qurylǵan dıvızııalardyń jáne brıgadalardyń 23 Jaýyngerlik týynyń dýblıkattary garnızondardyń ókilderine tapsyryldy. Olar elimizdiń ár aımaǵyna jetkizilmek.

1941 jyly Petropavlda 314-shi atqyshtar dıvızııasy quryldy. Mamandardyń aıtýynsha, Dıvızııanyń kúshimen 20-dan astam qala men 100-den astam eldi meken nemis basqynshylarynan azat etildi. «Ata-baba rýhyna laıyqty bolamyz» patrıottyq aktsııasyna oraı ataqty 314-shi atqyshtar dıvızııasynyń jaýyngerlik týynyń kóshirmesi Nur-Sultan qalasynan oblys ortalyǵyna arnaıy jetkizildi. Qorǵanys isteri jónindegi departamenti men basqarma Jaýyngerlik týdy oblystyq tarıhı-ólketaný mýzeıine saltanatty túrde tapsyryldy.

«Mýzeıde 314-shi atqyshtar dıvızııasynyń quramynda bolǵan jaýyngerlerdiń qurmetine arnalǵan burysh bar. Ardagerlerdiń jeke zattary, qujattary men fotosýretteri saqtalǵan. Qundy jádigerlerdi jaýyngerlerdiń urpaqtary da ákelip, berip jatady. Endi, munda mýzeıge kelýshiler bizdiń dıvızııanyń jaýyngerlik týynyń qandaı bolǵanyn kóre alady», - deıdi oblystyq tarıhı-ólketaný mýzeıiniń qyzmetkeri Vera Andreeva.

Eki aıdyń ishinde 23 Jaýyngerlik týdyń kóshirmeleri Qazaqstannyń barlyq óńirlerin aralap ótip, 7 mamyrda - Otan qorǵaýshy kúnine jáne Jeńis kúnine arnalǵan áskerı paradta ótý úshin Nur-Sultan qalasyna jetkiziledi.