SQO-ǵa 300 mlrd teńge ınvestıtsııa tartý josparlanýda
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov turǵyndarmen esep berý kezdesýinde óńirge tartylatyn ınvestıtsııalar jaıly aıtty, dep habarlaıdy QazAqparat tilshisi.
Byltyr oblys ınvestıtsııa tartý boıynsha ortasha respýblıkalyq kórsetkishten asyp, óńirler arasynda damý qarqyny jaǵynan 4-oryndy ıelendi. Oblys ákiminiń aıtýynsha, jeke ınvestıtsııalar bıýdjet esebinen tartylǵan ınvestıtsııalardan 4 ese artyq bolǵan.
Investıtsııanyń basym bóligi aýyl sharýashylyǵy men ónerkásipke jumyldyrylǵan.
«Sheteldik ınvestorlardyń qatysýymen ınvestıtsııalyq jobalardy ilgeri jyljytý - strategııalyq basty máselelerdiń qatarynda», - deıdi Qumar Aqsaqalov.
Ákimniń sózine qaraǵanda, aldaǵy 3 jylda óńirde mashınajasaý klasterinde, maıly daqyldardy óńdeý kesheninde, tsellıýloza óndirý, qurama jem óndirý, bıdaıdy tereń qaıta óńdeý salalarynda básekege qabiletti 5 jańa óndiris orny salynady. Osy jobalarǵa tartylatyn ınvestıtsııanyń jıyntyq mólsheri 300 mıllıard teńgeden asyp, 3 myńnan astam adamdy jumyspen qamtý múmkindigin beredi.
«Bul - bizdiń basty mindetimiz. Oblystyń óndiristik áleýetin, tarıhty eskere otyryp, ony ındýstrıaldy-agrarlyq óńirge aınaldyrýymyz qajet», - deıdi Q. Aqsaqalov.
