SQO-ǵa 1,2 myń doza vaktsına jetkizildi
PETROPAVL. QazAqparat – Soltústik Qazaqstan oblysynda koronavırýsqa qarsy vaktsınany 115 myń adam alady, birinshi kezeńde 1200 doza medıtsına qyzmetkerlerine berilmek, dep habarlaıdy QazAqparat tilshisi.
SQO-nyń bas memlekettik sanıtar dárigeri Áset Jumataevtyń aıtýynsha, Búginnen bastap medıtsına qyzmetkerlerine - sonyń ishinde ınfektsııalyq aýrýhana men statsıonarlarda jumys isteıtinderge, jedel járdem jáne sanıtarlyq-epıdemıologııalyq baqylaý qyzmetkerlerine berile bastady. Sondaı-aq birinshi kezeńde muǵalimder, polıtseıler, stýdentter jáne qant dıabeti sııaqty sozylmaly aýrýlary barlarǵa ekpe jasalady. Al turǵyndar arasynda eń aldymen táýekel tobyndaǵylarǵa vaktsına qoıylady.
«Oblysta barlyǵy 378 ekpe egetin kabınet bar. Koronavırýsqa qarsy vaktsına 17 pýnktte egiledi, onyń 13-i aýdanda jáne 4-ýi qalada ornalasqan. Búgin túnde 1200 doza reseılik vaktsına jetkizildi. Jospar boıynsha 115 myń vaktsına egiledi. Qaraǵandy farmatsevtıkalyq kompanııasynan sáýir-maýsym aralyǵynda aı saıyn 600 doza jetkizilip otyrady.
Búginnen bastap Reseıde óndirilgen Gam-KOVID-Vak - «Spýtnık V» vaktsınasyn qoldana otyryp, koronavırýstyq ınfektsııaǵa qarsy vaktsınatsııa bastaldy. Ári qaraı, 15 aqpannan bastap vaktsınatsııa protsesine Qaraǵandy farmatsevtıkalyq kesheni negizinde óndirilgen Gam-KOVID-Vak vaktsınasy qosylady. Sáýir aıynda qazaqstandyq vaktsına jetkizile bastaıdy», - deıdi Áset Jumataev.
Statsıonarlyq ekpe pýnktterinde táýligine 60 adamǵa, al jyljymaly beketterdi 40 adamǵa deıin vaktsına qoıylady. Ekpe alǵannan keıin adam 30 mınýttaı emdeý mekemesinde bolyp, dárigerge baqylanady. Al kelesi úsh táýlik boıy medıtsınalyq qyzmetker oǵan telefon arqyly habarlasyp, jaǵdaıyn bilip turady. Bas sanıtar dárigerdiń aıtýynsha, kez-kelgen ekpeden reaktsııa bolyp, aýyrady. Orny qyzaryp, dene qyzýy kóterilýi múmkin. Budan qoryqpaý qajet.
«Vaktsınatsııa - juqpaly aýrýlardyń, onyń ishinde koronavırýstyń aldyn alýdyń tıimdi ádisi. Biz jappaı ımmýndaýdyń arqasynda naýqastardyń deńgeıin tómendetip, nátıjesinde áleýmettik-ekonomıkalyq obektilerdiń qyzmetine qoıylǵan shekteýlerdi alyp tastap, kádimgi ómirge oralatynymyzǵa senimdimin.
Jalpy, 21 kún ótkennen keıin vaktsınanyń ekinshi komponenti egiledi. 1 doza - 0,5 ml. Ekpe alǵannan keıin de biz saqtyq sharalaryn umytpaýymyz kerek, ıaǵnı maska taǵamyz, ara qashyqtyqty saqtaımyz. Immýnıtet qalyptasýy úshin belgili bir ýaqyt ótýi qajet. Halyqtyń 70 % vaktsına alǵanda ǵana emin-erkin júrýge bolady», - deıdi SQO-nyń bas memlekettik sanıtar dárigeri Áset Jumataev.
