SQO energetıkteri qysta jaryq pen jylýdan kidiris bolmaıtynyn málimdedi

PETROPAVL. KAZINFORM — Soltústik Qazaqstan oblysynda bıylǵy jylytý maýsymyna daıyndyq qorytyndylandy. 

Petropavlda «AMANAT» partııasynyń oblystyq fılıaly janyndaǵy óńirlik damý, ekologııa jáne agrarlyq sektor jónindegi keńestiń birlesken otyrysy ótti. 

Energetıkterdiń aıtýynsha, Petropavldaǵy № 2 jylý-elektr ortalyǵy qysta jumys isteýge tolyq daıyn jáne resmı túrde daıyndyq aktisin alǵan. Bıyl tek josparly jóndeý jumystary ǵana emes, iri jańǵyrtý jobalary da júzege asqan.

Buǵan deıin atalǵan stantsııanyń tehnıkalyq jaǵdaıy jurtshylyq arasynda alańdaýshylyq týdyrǵan edi. Jabdyqtar ondaǵan jyl boıy tozǵan kúıde jumys istep kelgen. Qazandyqtar men týrboagregattardyń paıdalaný merzimi 50 jylǵa jýyqtaǵan. Generatsııalaý jabdyqtarynyń tozý deńgeıi 50-60% asyp ketken. 2022 jyly murjanyń qulaýy — stantsııa nysandarynyń tozǵanyn jáne qarjylandyrýdyń jetkiliksizdigin kórsetti.

«SEVKAZENERGO» AQ bas ınjeneri Petr Bogdanovtyń aıtýynsha, jóndeý jumystaryna 26,8 mlrd teńgeden astam qarajat bólindi. Qazandyqtar men týrbınalarǵa kúrdeli jóndeý júrgizilip, murjalar tekserildi. Jańa temirbeton murja bıyl iske qosylady. Stantsııa qoımasynda 169 myń tonna kómir bar. Bul — aldaǵy qys maýsymyn qıyndyqsyz ótkizýge jetkilikti.

— Ortalyq jylytý maýsymyna 100% daıyn. Eń bastysy — biz alǵa jyljyp, máselelerdi birtindep sheship jatyrmyz. Zııandy shyǵaryndylardy baqylaý júıelerin ornatyp, jabdyqtardy jańartyp, týrbınalardy qaıta jańǵyrtýdamyz. Bul stantsııanyń senimdiligin arttyryp, qala ekologııasyna jaǵymdy áser etedi, — dedi Petr Bogdanov.

Buǵan deıin Petropavlda jylytý maýsymy bastalǵanyn jazǵan edik.