SQO: Elektr jelilerin jańǵyrtýǵa jyl saıyn 4 mlrd teńge jumsalmaq

PETROPAVL. KAZINFORM – Soltústik Qazaqstan oblysyndaǵy elektr jelileri 95%, jylý jelileri 65% tozǵan. 

Óńirde kommýnaldyq jelilerdiń tozýy – ózekti másele. SQO ákimdiginiń málimetinshe, jylý jelileriniń jalpy uzyndyǵy 299,8 km bolsa, onyń 65% aýystyrýdy qajet etedi, onyń ishinde Petropavl boıynsha 244,4 km 74,6% tozyǵy jetken.

Osyǵan oraı jylýmen jabdyqtaýdy jaqsartý maqsatynda 8,4 mlrd teńgege 3 joba júzege asyrylyp jatyr.

Elektrmen jabdyqtaý boıynsha da jaǵdaı máz emes. Jelilerdiń jalpy uzyndyǵy 23,5 myń km bolsa, 4 myńǵa jýyq qosalqy stantsııa jumys isteıdi.

Óńirdi elektrmen qamtyp otyrǵan «Soltústik Qazaqstan Elektrjelistik Taratý Kompanııasy» AQ-nyń jelileri 95% jáne «Kókshetaý Energo» JShS-niń jelileri 80,6% tozǵan.

«Jaǵdaıdy jaqsartý úshin Úkimet ákimdikpen birlesip Soltústik Qazaqstan oblysynyń elektr jelilerin jańǵyrtý boıynsha Jol kartasyn ázirledi. Onyń aıasynda «Aýyl - el besigi» baǵdarlamasy boıynsha elektrmen jabdyqtaý jobalary ázirlenip jatyr. Jyl saıyn 4 mlrd teńge bólinedi. Osylaısha 2027 jylǵa deıin asa tozǵan jeliler jańaǵa aýystyrylady. Búgingi tańda 2,4 mlrd teńgege 11 joba ázirlendi, taǵy 5 joba daıyndalyp jatyr», - deıdi SQO ákimi Ǵaýez Nurmuhambetov.

Nátıjesinde óńirde elektrmen qamtý jelisiniń tozýy 95 %-ten 80 % deıin tómendemek.