SQO ekologtary tabıǵatqa zııan keltirýdiń 304 deregin anyqtady
PETROPAVL. QazAqparat – Soltústik Qazaqstan oblysynda byltyr ekologtar 95 nysandy tekserip, 9 myńǵa jýyq synama aldy. Nátıjesinde tabıǵatqa zııan keltirýdiń 304 deregin anyqtady, dep habarlaıdy QazAqparat tilshisi.
SQO Ekologııa departamentiniń málimetinshe, 95 nysannan anyqtalǵan 304 derektiń 254-i – ruqsat etilgen kontsentratsııany asyrýǵa baılanysty. Qalǵan jaǵdaıda shyǵaryndylar ruqsat etilgen shekten asyrylǵan.
Sonymen qatar, 1 kásiporynǵa 42 myń teńge kóleminde aıyppul salyndy. Jalpy somasy 7 mln teńgeniń 16 kinárat-talaby usynyldy.
Qorshaǵan ortany munaı ónimderimen lastaýdyń 3 deregi anyqtalyp, kinálilerden keltirilgen shyǵyn – 752 myń teńge óndirildi.
«Sý, atmosferalyq aýa jáne tabıǵı gamma-fon deńgeıin tekserý maqsatynda Petropavldyń jáne oblystyń 26 nysanynda monıtorıngilik baqylaý júrgizildi. Onyń 10-y sýǵa, 12-si aýaǵa jáne 4-eýi tabıǵı gamma-fonǵa qatysty nysandar. Olardyń eshqaısysynda tabıǵatqa zııan keltirý derekteri anyqtalmady», - deıdi SQO Ekologııa departamenti bóliminiń bas mamany Elena Mazık.
Al qyrkúıek aıynda ekologtar Polıtsııa departamentimen birge jedel-profılaktıkalyq is-sharasyn ótkizdi. Maqsat – qorshaǵan ortaǵa kóp mólsherde ýly gaz bóletin kólikterdi anyqtaý. Nátıjesinde eki kún ishinde 22 avtokólik tekserilip, 9-yna aıyppul salyndy.
