SQO ekologtary suıyq tyńaıtqyshty durys saqtamaǵan seriktestikti sotqa berdi
PETROPAVL. QazAqparat – Soltústik Qazaqstan oblysynda suıyq tyńaıtqyshty saqtaýda ekologııalyq talaptardy buzǵan jaýapkershiligi shekteýli seriktestikti ekologııa departamenti sotqa berdi, dep habarlaıdy QazAqparat tilshisi.
SQO boıynsha ekologııa departamentiniń málimetinshe, bıyl maýsym aıynda vedomstvoǵa Shal aqyn aýdany Novopokrovka eldi mekeniniń turǵyndarynan ujymdyq ótinish túsken. Halyq «Asyl logıstıks» JShS-ge qatysty tekseris júrgizýdi suraǵan. Sonyń negizinde sharýashylyqtyń Shal aqyn aýdany Novopokrovka eldi mekeninde ornalasqan nysanynda ekologııalyq talaptardyń saqtalýyna, sonyń ishinde ósimdikterdi qorǵaýǵa arnalǵan quraldardy, mıneraldy tyńaıtqyshtardy jáne basqa da preparattardy tasymaldaý, saqtaý men qoldaný erejeleriniń oryndalýyna kezekten tys tekseris júrgizildi.
Tekseristiń qorytyndysy boıynsha suıyq tyńaıtqyshtardy saqtaýda ekologııalyq talaptardyń buzylǵany, QR zańnamasyna sáıkes mindetti memlekettik ekologııalyq saraptamanyń jasalmaǵandyǵy anyqtalǵan.
Osyǵan baılanysty ekologtar ákimshilik quqyqbuzýshylyq boıynsha hattama toltyryp, olqylyqtardyń ornyn toltyrýǵa nusqama berdi. Alaıda, JShS tekseristiń qorytyndysymen kelispeı, SQO mamandandyrylǵan aýdanaralyq ákimshilik sotyna ony zańsyz dep tanyp, olqylyqtardyń ornyn toltyrý týraly usynymnyń kúshin joıý jóninde talap joldady. Sot JShS-niń ekologııa departamentine qatysty talap-aryzyn qanaǵattandyrmady.
Mamandardyń aıtýynsha, 26 tamyzda SQO boıynsha ekologııa departamenti oblystyń mamandandyrylǵan aýdanaralyq ekonomıkalyq sotyna Shal aqyn aýdany Novopokrovka eldi mekeninde ornalasqan suıyq tyńaıtqyshtar quıylǵan arnaıy ydystardy qoldanýdy toqtatýǵa talap aryz joldady. Oǵan ekologııalyq zańnamanyń buzylýy negiz boldy. Sot talap aryzdy óndiriske alyp, azamattyq is qozǵaldy.
Esterińizge salaıyq, Shal aqyn aýdany Krıvoşekov eldi mekeninde hımıkattan ýlanyp, 30-dan astam qoı qyrylyp qalǵan edi. Aýyl turǵyndary bul jaǵdaı Novopokrovka eldi mekeninde de qaıtalanýy múmkin dep alańdaýshylyq bildirip otyr.
