SQO ekologtary Esil ózeniniń jaǵdaıyna monıtorıng júrgizdi
PETROPAVL. QazAqparat – Soltústik Qazaqstan oblysynda ekologtar Esil ózeniniń iri kásiporyndar ornalasqan jerinen synama alyp, sýda lastaýshy zattardyń bar-joǵyn anyqtady, dep habarlaıdy QazAqparat tilshisi.
SQO ekologııa departamenti baspasóz qyzmetiniń málimetinshe, Esil ózeniniń jaı-kúıine monıtorıngtik baqylaýlar óńirdiń iri kásiporyndarynyń emıssııalaryn monıtorıngileýdiń jospar-kestesine sáıkes júrgizildi.
Zertteý úshin «SevKazEnergo» AQ, «Qyzyljar sý» JShS, «Tazartý, sý ótkizý jáne sý burý qurylystary» ShJQ RMK, sonymen qatar «Nura toptyq sý qubyry» ShJQ RMK «Esil sý» fılıaly Esil, Býlaev jáne Esil óndiristik ýchaskeleri tógindileri bar jerler alyndy.
Mamandar synama alý arqyly sýdaǵy munaı ónimderiniń, fenoldyń, nıtrattyń, nıtrıttiń, kaltsııdiń, magnııdiń, hlorıdterdiń, sýlfattardyń, ftorıdterdiń, temirdiń, alıýmınııdiń, mystyń, myrysh pen nıkel sııaqty basqa da zattardyń maksımaldy deńgeıin anyqtady.
Júrgizilgen taldaýlardyń nátıjesi boıynsha iri kásiporyndar tógindileriniń Esil ózeniniń jaı-kúıine áseri joqtyǵy anyqtaldy. Ekologtardyń aıtýynsha, sýdaǵy zattardyń quramy shekti ruqsat etilgen kontsentratsııadan aspaıdy.
Jalpy bıyl departament mamandary 188 sý synamasyn alyp, 964 lastaýshy zattardyń kontsentratsııasyna tekserdi.
Aqerke Dáýrenbekqyzy
