SQO eki aýdanynda sý tasqynymen kúres aqsap tur - TJD

PETROPAVL. QazAqparat – Soltústik Qazaqstan oblysynda kóktemgi sý tasqynymen kúresý úshin Tótenshe jaǵdaılar departamentiniń daǵdarys ortalyǵynda jedel shtab jumys istep jatyr, dep habarlaıdy QazAqparat tilshisi.

SQO ákimdiginde kóktemgi sý tasqynymen kúreske daıyndyq pysyqtaldy. Óńirde sońǵy kúnderi qar qarqyndy erip jatyr.

Sý tasqynymen kúresý úshin birqatar shara qolǵa alynǵan.

SQO tótenshe jaǵdaılar departamentiniń bastyǵy Ramıl Kamalovtyń aıtýynsha, eldi mekenderden qar shyǵarý jumysy toqtaǵan joq, jetpegen ınjenerlik tehnıkany jalǵa alý boıynsha kelisim jasalyp jatyr.

Qater basym Ýálıhanov, Aıyrtaý jáne Ǵabıt Músirepov aýdandarynda ózenderde muz jarý jumystary júrgizilgen.

«25 naýryz kúni Ǵabıt Músirepov aýdanyna jeke quramnyń 23 adamy jáne 4 tehnıka jiberildi. Qazir taǵy eki top Tımırıazev jáne Aıyrtaý aýdandaryna attanýǵa daıyndalyp jatyr. Olar topan sýdyń aldyn alý boıynsha jumystar júrgizedi. Bizdiń departamenttiń daǵdarys ortalyǵynda jedel shtab quryldy. Jaǵdaıdy baqylaýǵa aldyq», - deıdi Ramıl Kamalov.

Osy kúnderi jeke sektordaǵy 308 úıdiń aýlasyna kirgen sý sorǵyzylǵan. Sý áli kelip jatyr.

«Erigen qar sýy basýy múmkin eldi mekenderden qar shyǵarý jumystaryn jedel túrde aıaqtaý kerek. Sondaı-aq qazirgi jaǵdaıǵa baılanysty eldi mekenderdegi, respýblıkalyq, oblystyq jáne jergilikti mańyzdaǵy joldardaǵy sý ótkizý qubyrlaryn, aryqtar men kanaldardy tazartýdy jedeldetý qajet. Bizdegi aqparat boıynsha Aqjar jáne Jambyl aýdandarynda sý tasqynymen kúres jumystary aqsap jatyr. Bul aýdandarǵa eki kún ishinde eldi mekenderde tasqyn sýdyń aldyn alý jumystary aıaqtalýy tıis», - deıdi departament bastyǵy.