SQO egis alqaptarynyń 31 paıyzynda ylǵal qory jetkiliksiz
PETROPAVL. QazAqparat – Soltústik Qazaqstan oblysynda «Qazgıdromet» mamandary egis alqaptarynyń ylǵal qoryn anyqtady. Júrgizilgen taldaýǵa sáıkes óńir aýmaǵynyń 31%-ynda ylǵal jetkiliksiz, dep habarlaıdy QazAqparat tilshisi.
«Qazgıdromet» RMK SQO fılıaly 21-30 sáýir aralyǵynda agrometeorologııalyq jeli arqyly topyraqtyń ylǵal qoryn anyqtaý maqsatynda kóktemgi tekserý júrgizdi.
Ol úshin 20 myń ga alqap, sonyń ishinde 15 myń ga egistik jer, 4 myńǵa ga jýyq súdiger, 770 ga parǵa qaldyrylǵan tanap jáne 58 ga kópjyldyq ósimdikke arnalǵan alqap tańdap alyndy.
«Zertteý nátıjesi topyraqtyń metrlik qabatynda 11-163 mm ylǵal qory barlyǵyn kórsetti, bul normanyń 9-114 %-y. Qalypty jaǵdaıda 115-166 mm bolýy tıis. Al Aıyrtaý, Esil, Ǵ.Músirepov, Aqjar jáne Qyzyljar aýdandarynda topyraqtyń metrlik qabatyndaǵy ylǵal qory normadan 48-91 % tómen. Qalǵan aýdandarda normaǵa jaqyn», - deıdi mamandar.
Bıyl SQO-da topyraq qabaty ádettegiden 9-10 kúnge erte jylyǵan.
Bul qar jamylǵysynyń tez erýine, sondaı-aq erigen qar sýynyń býlanyp, topyraqqa tez sińýine yqpal etken.
Jalpy kóktemgi topyraqtaǵy ylǵal qoryna qysqa keter aldyndaǵy kúzgi topyraqtaǵy ylǵaldyń mólsheri, qystaǵy jaýyn-shashyn mólsheri jáne qar jamylǵysyndaǵy ylǵal qorynyń mólsheri áser etedi.
«Júrgizilgen taldaýǵa sáıkes SQO aýmaǵynyń 31 %-ynda - Qyzyljar, Aıyrtaý, Esil jáne Aqjar aýdandarynda ylǵal qory jetkiliksiz. 46 %-ynda, ıaǵnı Jambyl, Tımırıazev, Aqqaıyń, Ýálıhanov, Taıynsha aýdandarynyń alqaptarynda qanaǵattanarlyq jáne 23 %-ynda - Mamlıýt, M. Jumabaev jáne Shal aqyn aýdandarynda topyraqtyń ylǵal qory qolaıly», - deıdi fılıal qyzmetkerleri.
Al saban, súdiger jáne parǵa qaldyrylǵan alqaptarda ylǵal qory kúzben salystyrǵanda oblys boıynsha orta eseppen 42 %-ǵa artqan.
