SQO dúkenderindegi sheteldik azyq-túliktiń 92,2 paıyzy talapqa saı emes
PETROPAVL. QazAqparat - Soltústik Qazaqstan oblysynyń keıbir saýda oryndarynda merzimi ótken jáne qaýipti bakterııalar bar ónimder saýdalanyp kelgen, dep habarlaıdy QazAqparat tilshisi.
SQO Qoǵamdyq densaýlyqty saqtaý departamenti mamandarynyń málimetinshe, bıyl 10 aı ishinde oblys aýmaǵynyń saýda oryndarynda jáne qoǵamdyq tamaqtaný nysandarynda 252 tekseris júrgizildi. Taǵam ónimderiniń 5 myńǵa jýyq úlgisi satyp alynyp, zertteldi. Nátıjesinde, 527 synama úlgisiniń shamamen 11 paıyzy talaptarǵa sáıkes kelmegen.
Atap aıtqanda, et óniminiń 39 jáne qus etiniń 4 synamasynyń zattańbasynda kórsetilmegen dońyz DNK-si tabyldy, olardyń barlyǵy reseılik ónimder. Sondaı-aq, Reseıde shyǵarylǵan kotlet, tartylǵan et, kondıterlik jáne shujyq ónimderi men tushparanyń 29 synamasynan ishek taıaqshalary, zeń, ashytqy anyqtaldy. Taǵy 10 synamada (qus eti, tartylǵan et) salmonella bakterııalary bar bolyp shyqty.
Aıta keterligi, talaptarǵa saı kelmegen ónimderdiń 92,2 paıyzy shetelden jetkizilgen. Onyń 55,7% Reseıden, 12,5% Qytaıdan, 6,7% Túrkııadan, 4,8% Frantsııadan, 2,8% Polshadan, 2,8% Qyrǵyzstanna, 1,9% Ýkraınadan, 1,9% Serbııadan, 1% Germanııa, AQSh, Ispanııa, Italııa jáne Ózbekstan elderinen ımporttalǵan. Qalǵan 7,8% - otandyq ónimder.
Qoǵamdyq densaýlyq saqtaý departamentiniń bastyǵy Serikbaı Qasmaqasovtyń aıtýynsha, taǵy 39 synamada ónimniń paıdalaný merzimi ótip ketkeni anyqtalǵan. Soǵan qaramastan olar saýdalanyp kelgen. Bul synamalar Petropavldaǵy «Fenıks» dúkeninen, Aqjar aýdany Talshyq aýylyndaǵy «Jalyn» JShS-dan, Aqqaıyń aýdany Lenınskoe aýylyndaǵy «Astana» dúkeninen, Jambyl aýdany Presnovka aýylyndaǵy «Lakomka» men Ýálıhanov aýdany Kishkenekól aýylyndaǵy «Nur Astana» dúkenderinen alynǵan.
«Kóptegen jaǵdaılarda sáıkessizdik ónimniń zattańbasynda anyqtalady. ıAǵnı daıyndaý kúni, ázirleýshi el kórsetilmegen, memlekettik tilge aýdarylmaǵan bolyp shyqty. Sáıkessizdiktiń úlken úles salmaǵy balyq pen balyq ónimderinde anyqtaldy, barlyǵy 101 synama alynǵan. Óńirdiń ishki naryǵyndaǵy barlyq sáıkes kelmeıtin ónimderdiń eń kóp paıyzyn shetten kelgen ónimder quraıdy - 92,2%»,- deıdi departament bastyǵy Serikbaı Qasmaqasov.
Mamandardyń aıtýynsha, tekseris qorytyndysy boıynsha ákimshilik quqyqbuzýshylyq týraly 35 hattama toltyrylǵan. Ereje buzǵandarǵa 2 mln 165 myń teńge aıyppul salyndy. Qazaqstan Respýblıkasy zańynyń talaptaryn buzýdy joıý týraly 114 jazbasha ókim berildi. Tehnıkalyq reglamentterdiń talaptaryna sáıkes kelmeıtin ónimder: 12 kg 400 g et ónimi, 12 kg 640 g qus eti joıyldy.
