SQO dıqandaryna organıkalyq ósimdik sharýashylyǵyna kóshý usynyldy
PETROPAVL. QazAqparat - Soltústik Qazaqstan oblysynda organıkalyq ónimniń artyqshylyqtary men ony óndirýdiń erekshelikteri týraly máseleler qozǵalyp jatyr, dep habarlaıdy QazAqparat tilshisi.
Organıkalyq ósimdik sharýashylyǵyna qatysty semınardy SQO «Atameken» Kásipkerler palatasy uıymdastyrdy. Álemde organıkalyq ónimge degen suranys jyldan jylǵa artyp keledi. Ásirese Eýropa elderi ekologııalyq taza azyq-túlikti áldeqaıda joǵary baǵaǵa satyp alýǵa daıyn.
Bıyl soltústikqazaqstandyq dıqandar 4,9 mln gektarǵa egin ekpek. Byltyr maıly daqyldardyń aýmaǵy 1 mln gektarǵa jetken edi. «Atameken» UKP biliktilik ortalyǵynyń dırektory Ársen Kerimbekovtiń aıtýynsha, aýyl sharýashylyǵyn ártaraptandyrý óz nátıjesin berdi. Endi organıkalyq ósimdik sharýashylyǵymen aınalysýǵa da bolady. Soltústikqazaqstandyq dıqandar úshin ázirshe tańsyq sala jaıynda túsinik berý úshin Petropavl qalasynda eki kúndik semınar ótip jatyr.
«Biz semınarǵa organıka jaıynda túsindirip beretin mamandardy shaqyrdyq. Óıtkeni kópshilik áli kúnge deıin organıkaǵa ne jatatynyn bilmeıdi. Sodan keıin organıkalyq eginshilikke kóshý talaptaryn aıtamyz. Dıqandar tarapynan suraqtar kóp, olardyń basym bóligi hımııadan bas tartýǵa daıyn emes», - deıdi Ársen Kerimbekov.
Mamandardyń aıtýynsha, kez kelgen daqyldy organıkalyq jolmen ósirýge bolady. Tabıǵı ónim alam deıtin sharýalarǵa hımııalyq tyńaıtqyshtarǵa shyǵyndanýdyń qajeti joq. Alaıda bastapqy kezde ónimdilik áldeqaıda az bolady. Organıkamen aınalasýdyń artyqshylyǵy ónimniń kóleminde emes, sapasy men baǵasynda.
«Organıkamen aınalyssa qoımany, kólikti, alqap pen ónimdi sertıfıkattaý kerek. Onymen halyqaralyq uıymdar shuǵyldanady. Eń jaqyny Kıev pen Vılnıýsta ornalasqan. Baǵasy da qymbat. Sondaı-aq ónimniń tereń saraptamasyn alý úshin dıqandar sheteldik zerthanalarǵa júginýge májbúr. Óıtkeni jergilikti zerthanalar ónimnen pestıtsıdtiń tek 20 túrin ǵana baıqasa, eýropalyqtar 2 myńǵa deıin kóre alady. Sol sebepti, qazir ózimizde qazaqstandyq sertıfıkattaý kompanııasyn ashý máselesi tur», - deıdi ol.
Búginge deıin elimizdiń 60-qa jýyq sharýashylyǵy 270 myń gektar jerge organıkalyq ónim ósirýdi bastady. Aralarynda soltústikqazaqstandyq dıqandar da bar. Birqatary óz tájirıbelerimen bólisý úshin keldi.
«Organıkalyq dándi daqyldardy Eýropa elderine eksporttaýmen 10 jyldan beri aınalysyp kelemiz. Ózimizdiń egistik alqabymyz bolmaǵan soń, seriktes kompanııalarmen jumys isteımiz. Olarǵa sertıfıkattaýdan ótýge kómektesemiz. Jylyna shamamen 5-10 myń tonna ónimdi ekporttaımyz. Basqosý barysynda organıkamen aınalysamyn deýshilerge neden bastaý kerek, qandaı qıyndyqtar kezdesýi múmkin ekendigin túsindirip, artyqshylyǵyn aıtyp berdik», - deıdi «Dıqanshy» JShS satý jónindegi menedjeri Ilıa Pampýr.
Semınarǵa oblystyń 80-ge jýyq sharýashylyǵynyń basshylary men agronomdary qatysty. Olarǵa óz tájirıbelerimen qazaqstandyq dıqandar men sarapshylar ǵana emes, reseılik ǵalymdar da bólisti.
