SQO dıqandary bıyl 4,4 mln tonna astyq jınap aldy

PETROPAVL. QazAqparat – Soltústik Qazaqstan oblysynyń dıqandary egin oraǵyn aıaqtap, bıyl 4,4 mln tonna bıdaıdy qambaǵa quıdy, dep habarlaıdy QazAqparat tilshisi.

SQO aýyl sharýashylyǵy basqarmasynyń málimetinshe, bıyl 2,9 mln ga alqapqa dándi daqyl egildi. Nátıjesinde ár gektardan orta eseppen 15 tsentnerden ónim alyndy. Bıylǵydaı ystyq pen qýańshylyqta bul jaman kórsetkish emes.

«Astyq shyǵymdylyǵyn arttyrý maqsatynda jáne topyraqtyń qunaryn saqtap qalý úshin bıyl sharýalar 133,3 myń tonna mıneraldy tyńaıtqyshqa tapsyrys berdi. Búginge deıin onyń 123,8 myń tonnasynyń aqshasy zaýyttarǵa tólendi. 1,8 mln ga jer óńdeldi. Tyńaıtqysh qoldaný nátıjesinde sharýalar aýa raıynyń qolaısyzdyǵyna qaramastan ortasha ónim aldy», - deıdi SQO aýyl sharýashylyǵy basqarmasynyń agronomııa bóliminiń bas mamany Baqtııar Toqjigitov.

Oraq naýqanyn merziminde aıaqtaý úshin egis alqabyna 7,5 myń kombaın shyqty.

«Kóktemgi jáne kúzgi dala jumystaryn júrgizýge oblysqa 75,1 myń tonna dızel otyny qajet. Memleket bul mólsherdi kepildi baǵamen munaı óńdeıtin zaýyttardan berdi. Nátıjesinde dıqandar onyń 1 lıtrin 172 teńgeden aldy. Jalpy bıyl janar-jaǵarmaı ýaqytynda jáne jetkilikti mólsherde jetkizilip turdy», - deıdi Baqtııa Toqjigitov.

Óńirde kartop ta jınalyp alyndy. Bıyl 32,9 myń ga kókónis egilse, odan 490 myń tonna kartop jınaldy. Gektar berekeligi 149,3 tsentnerden aınaldy.

Qazir SQO-da maıly daqyl jınalyp jatyr. Osy kúnge deıin 845,1 myń ga bastyryldy. Bul - bar alqaptyń 91,6%. Ár gektardan orta eseppen 8,4 tsentnerden alynyp jatyr.