SQO dıqandary 5,3 mln tonna astyq jınady
ASTANA. QazAqparat - Soltústik Qazaqstan oblysynyń dıqandary bıyl 5,3 mln tonna astyq jınady. Bul týraly búgin ortalyq komýnıkatsııalar qyzmetindegi brıfıngte Soltústik Qazaqstan oblysynyń ákimi Qumar Aqsaqalov aıtty, dep habarlaıdy QazAqparat tilshisi.
«Agroónerkásip kesheni - óńirimizdiń ekonomıkalyq ósiminiń negizi. Ótken kezeńde aýyl sharýashylyǵyna tartylǵan ınvestıtsııanyń kólemi 64,2 mlrd teńge boldy. Bul jalpy respýblıkalyq kólemniń 22,8 paıyzyn quraıdy»,- dedi oblys basshysy.
Onyń aıtýynsha, Soltústik Qazaqstan oblysy jyl saıyn elimizdegi astyq ónimderiniń 30 paıyzǵa jýyǵyn jáne maıly daqyldardyń 40 paıyzdan astamyn óndiredi.
«Bıyl egin shyǵymdylyǵy gektarynan 19 tsentnerden aınalyp, jalpy alǵanda 5,3 mln tonna astyq jınadyq. Jalpy tabys bir jyl ishinde dándi-daqyldan - 61 mlrd teńgege, maıly daqyldan - 25 mlrd teńgege ósti», - dedi Qumar Aqsaqalov.
Oblys ákiminiń dereginshe, qańtar-qazan aılarynda óndirilgen aýyl sharýashylyǵy ónimderiniń kólemi 1,9 paıyzǵa ósip, 464,1 mlrd teńgeni quraǵan. Osynyń barlyǵyna joǵary tehnologııalardy qoldaný, mıneraldy tyńaıtqyshtardy paıdalaný jáne tsıfrlyq júıege kóshýdiń arqasynda qol jetkizilip otyr.
