SQO dıqandary 3 mln tonnaǵa jýyq bıdaıdy qambaǵa quıdy
PETROPAVL. QazAqparat – Soltústik Qazaqstan oblysynda dıqandar 2,9 mln tonnadan astam bıdaıdy jınap, barlyq egis alqabynyń 68,5% ordy, dep habarlaıdy QazAqparat tilshisi.
SQO aýyl sharýashylyǵy jáne jer qatynastary basqarmasynyń málimetinshe, oraq naýqany qyrkúıek aıynyń aıaǵyna deıin bitýi tıis. Bıyl óńirde 4,2 mln ga alqapqa dándi daqyldar egildi, sonyń 2,8 mln ga – bıdaı. 22% nemese 932 myń ga-na maıly daqyldar sebildi.
«Qazirgi tańda oraq naýqany shtattyq rejımde ótip jatyr. Aýa raıy dıqandar úshin qolaıly. Búginge deıin 2 mln ga astam alqaptyń bıdaıy jınap alyndy. Bul – egistiktiń 68,5%-i. Qambaǵa 2,9 mln tonnadan astam astyq quıyldy. Kombaınerler ár gektardan ortasha 14,3 tsentnerden alyp jatyr. Bıdaı jáne dándi-burshaqty daqyldardyń shyǵymdylyǵy boıynsha Qyzyljar aýdany alda keledi», - deıdi basqarma bastyǵynyń orynbasary Qýandyq Shakýbaev.
SQO - egis alqaptaryna mıneraldy tyńaıtqysh sebýden el boıynsha aldyńǵy orynda. 2017 jyly nebary 91 myń tonna tyńaıtqysh qoldanylsa, bıyl 130 myń tonna mıneralmen 2,3 mln ga óńdeldi.
Astyqtyń shyǵymdylyǵyn arttyrý úshin elıtalyq tuqymdar alynyp jatyr. Bıyl barlyq tuqymnyń 9% jańalandy.
Sońǵy úsh jylda 90 mlrd teńgege 782 traktor, 600-den astam kombaın satyp alyndy. Bıyl 38 mlrd teńgege 1522 aýyl sharýashylyǵy tehnıkasy jańalandy. Jyl sońyna deıin taǵy 3 mlrd teńgege traktor-kombaın alynbaq.
