SQO dıqandaryna qandaı kómek kórsetildi
Soltústik Qazaqstan oblysynyń ákimi Gaýez Nurmuhambetov bıylǵy aýa raıynyń qolaısyzdyǵyna baılanysty óńir agrarıılerine qansha qoldaý kórsetilgenin aıtty, dep habarlaıdy Kazinform.
«Aýyl sharýashylyǵy taýaryn óndirýshiler úshin bıyl kúrdeli jyl boldy. Dándi daqyldar ósip-jetiletin kezeńde jaýyn-shashyn bolmady. Tamyzdan bastap astyq bastyrylatyn ýaqytta oqtyn-oqtyn jaýyn jaýdy. Sondyqtan da munyń bári sapaly nan jınaýǵa kedergi keltirdi. Osyǵan qaramastan agrarııler gektaryna 11,1 tsentnerden 3 mln 700 myń tonna astyq bastyrdy. Árıne, bul SQO taýar óndirýshileri úshin ortasha kórsetkish. Maıly daqyldardan da jaqsy ónim aldyq. Sýbsıdııaǵa qatysty aıtar bolsam, shamamen 61 mlrd teńge tólendi. Ósimdik sharýashylyǵy boıynsha – shamamen 20 mlrd teńge, mal sharýashylyǵy boıynsha – 11 mlrd teńge. Taýar óndirýshilerimiz jyl saıyn shamamen 2,5 myń teǵhnıka satyp alady. Onyń somasy 70 mlrd teńgege jýyqtaıdy. Eger shetelde shyǵarylǵan tehnıka satyp alynsa, 25 paıyzy, otandyq óndiristegi tehnıka bolsa 30 paıyzy sýbsıdııalanady. Sol arqyly taýar óndirýshilerdi otandyq tehnıka satyp alýǵa yntalandyramyz», - dedi óńir ákimi Ortalyq kommýnıkatsııalar qyzmetindegi brıfıngte agenttik tilshisiniń saýalyna oraı.
Onyń atap ótýinshe, Aýyl sharýashylyǵy mınıstrligi tarapynan 19 mlrd teńge kóleminde qosymsha sýbsıdııa bólindi.
«Jalpy, osy kómekter arqyly taýar óndirýshilerimizdiń 83 mlrd teńge kóleminde qajettiligin qanaǵattandyrdyq. Sýbsıdııa alýǵa shamamen 20 myń ótinim túsip, 90 paıyzdan astamy qanaǵattandyryldy. Bul taýar óndirýshilerimiz úshin jaqsy kórsetkish. Árıne, kóktemgi dalalyq jáne astyq jınaý kezeńderinde jeńildetilgen dızel otynyn bólýge qatysty máseleler bar. Kúz jańbyrly boldy. Búginde Soltústik Qazaqstan oblysynda 317 astyq keptirgish bar. Taýar óndirýshilerimiz astyqty keptirý úshin bekitilgen baǵamen 19 700 tonna dızel otynyn aldy. Osylaısha, memleket olarǵa astyqtaryn saqtap qalýǵa kómek kórsetti», - dedi Gaýez Nurmuhambetov.
