SQO: Densaýlyq saqtaý basqarmasy qorǵanysh kıimderin negizsiz qymbat baǵaǵa alǵan
SQO sybaılas jemqorlyqqa qarsy qyzmet densaýlyq saqtaýǵa qatysty úsh memlekettik uıymdy tekserip, sybaılas jemqorlyq táýekelderine syrtqy taldaý júrgizdi.
Mundaı taldaý jumysy barlyq óńirler boıynsha uıymdastyrylǵan. Nátıjesi boıynsha respýblıkalyq deńgeıde shara qoldanylady.
«SQO densaýlyq saqtaý basqarmasyna, SQO sanıtarııalyq-epıdemıologııalyq baqylaý departamenti men onyń Petropavldaǵy basqarmasynyń jumysyna taldaý júrgizildi. Jumys barysynda COVID-19-ben kúreske bólingen qarajattyń maqsatty jumsalýy, ıaǵnı jeke qorǵanysh quraldaryn, medıtsınalyq jabdyqtardy tıimdi baǵaǵa jetkilikti túrde satyp alý jaǵdaılary jáne medıtsına qyzmetkerlerine ústemeaqy tóleýge bólingen bıýdjettiń durys ıgerilýi tekserildi. Syrtqy taldaý barysynda birqatar olqylyq anyqtalyp, sybaılas jemqorlyqqa jol beretin jaǵdaılardy joıýǵa 41 usynys jasaldy», - deıdi QR sybaılas jemqorlyqqa qarsy is-qımyl agenttiginiń SQO boıynsha departament jetekshisi Jarqyn Ǵalymov.
Sybaılas jemqorlyqqa qarsy qyzmet júrgizgen syrtqy taldaý nátıjesinde sanıtarııalyq-epıdemıologııalyq baqylaý departamentiniń jumysynda negizgi qaýipti aımaqtar anyqtaldy.
«Ákimshilik quqyqbuzýshylyq týraly Kodekstiń 425-baby 1-bólimin ámbebap dep aıtýǵa bolady. Bul bapty azyq-túlik ónimin shyǵarýshylar tehnıkalyq reglamentti jáne medıtsınalyq mekemelerdiń, qoǵamdyq tamaqtaný oryndary men saýda ortalyqtarynyń jaýapty tulǵalary sanıtarlyq talaptardy buzǵanda, al 2020 jyldyń jazynan qarapaıym turǵyndarǵa karantındik sharalardy buzǵany úshin qoldanylyp keledi», - deıdi QR sybaılas jemqorlyqqa qarsy is-qımyl agenttiginiń SQO boıynsha departamenttiń basqarma basshysy Damır Habıbýlın.
Bul bapty buzǵandarǵa 30 AEK – 87 510 teńge aıyppul salynady. Maska taqpaǵany úshin osyndaı úlken kólemde aıyppul tóleý otbasy bıýdjetine aıtarlyqtaı salmaq salady. Aıta ketetin taǵy bir jaıt, saýda ortalyqtarynda karantın talaptarynyń saqtalýyna jaýapty tulǵalarǵa maska taqpaǵany úshin jeke tulǵa retinde de dál sol kólemde aıyppul salynady eken.
«Sanıtarııalyq-epıdemıologııalyq baqylaý departamentiniń qyzmetkerlerine ústemeaqy tóleýde olqylyqtar anyqtaldy. Koronavırýspen kúreske jumyldyrylmaǵan mamandar, ıaǵnı qujatpen jumys istegen qyzmetkerlerge ústemeaqy tólengen. Artyq tólengen qarajat – 500 myń teńgeden asady. Aqsha bıýdjetke qaıtaryldy», - deıdi Damır Habıbýlın.
Al jeke qorǵanysh kıimderin satyp alýda densaýlyq saqtaý basqarmasy bıýdjet qarajatyn tıimsiz jumsaǵan. Tekseris barysynda mekemeniń kásipkerden qorǵanysh kıimderiniń bir danasyn 40 327 teńgege satyp alǵany anyqtaldy. Osylaısha 27 mln 664 myń teńgege 686 danasy alynǵan. Dál sol ýaqytta «SK-Farmatsııa» JShS 7020 kostıýmdi 165 mln 250 myń teńgege alǵan. Munda bir danasy 23 540 teńgege shyqqan. Basqarmaǵa 115 mln teńgeni únemdeýge bolar edi.
SQO densaýlyq saqtaý basqarmasy basshysynyń orynbasary Nurlan Aımanovtyń aıtýynsha, ol ýaqytta elde tótenshe jaǵdaı jarııalanyp, satyp alýlardy erekshe tártippen júrgizýge týra kelgen eken.