SQO densaýlyq saqtaý basqarmasy basshysynyń orynbasary alǵashqylardyń biri bolyp KVI-ge qarsy egildi
PETROPAVL. QazAqparat – Soltústik Qazaqstan oblysynda koronavırýsqa qarsy vaktsınatsııa bastaldy, alǵashqylardyń biri bolyp ekpeni densaýlyq saqtaý basqarmasy basshysynyń orynbasary Nurlan Aımanov aldy, dep habarlaıdy QazAqparat tilshisi.
SQO densaýlyq saqtaý basqarmasy basshysynyń orynbasary Nurlan Aımanov koronavırýsqa qarsy vaktsına alyp, áserimen bólisti.
«Vaktsına alǵannan keıingi jaǵdaıym jaman emes, ózimdi jaqsy sezinip otyrmyn. Sońǵy ret shamamen 10 jyl buryn ekpe alǵan ekenmin, sol sebepti qobaljý bar. Ine piskende aýyrmaıdy, saýsaqtan qan alǵanmen birdeı, sol sebepti qorqýdyń qajeti joq.
Medpersonal barlyq talaptardy oryndap, óz mindetterin saýatty oryndap jatyr. Qazir 30 mınýttan keıin qaıta tekserilemin», - dedi Nurlan Aımanov.
Dárigerdiń aıtýynsha, qazirgi tańda vaktsınatsııa - koronavırýspen kúrestiń, ári qaraı taralmaýynyń tıimdi joly ekenin álem moıyndap otyr.
«Halyqty kóbirek vaktsınatsııalaý arqyly biz tizbekti územiz. Osylaısha syrqattanǵandar sanyn azaıtyp, burynǵy tynysh ómirimizge qaıta oralamyz.
Keshe túngi saǵat 03.00 shamasynda 1200 doza – birinshi komponenti jetkizildi. Onyń barlyǵy negizinen medıtsınalyq qyzmetkerlerge egiledi. Búgin túske deıin medıtsınalyq mekemelerge bólip berdik. Vaktsına 13 aýdanda jáne Petropavl boıynsha 4 pýnktte – barlyǵy 17 jerde egiledi. Ázirge kúndelikti qansha adamǵa ekpe jasalatyndyǵyn aıtý erterek. Alaıda bir ekpe egý kabınetinde medqyzmetkerler eń kóp degende 60 adamdy qamtıtyn bolady», - dedi SQO densaýlyq saqtaý basqarmasy basshysynyń orynbasary Nurlan Aımanov.
