SQO-da Sincere Systems Group qarjy pıramıdasynyń qyzmeti toqtatyldy

PETROPAVL. KAZINFORM - Soltústik Qazaqstan oblysynda «Sincere Systems Group» qarjylyq pıramıdasynyń zańsyz qyzmeti áshkere boldy.

Bul týraly QR Qarjylyq monıtorıng agenttiginiń óńirlik departamenti habarlady.

Vedomstvonyń málimetinshe, atalǵan uıym 2022–2023 jyldar aralyǵynda jumys istegen. Qazirgi tańda «Sincere Systems Group» qarjy pıramıdasynyń qurylymdyq bólimshesin qurý men basqarýǵa qatysty sotqa deıingi tergeý amaldary júrgizilip jatyr. 

Tergeý barysynda kompanııanyń Qazaqstanda tirkelmegeni jáne eshqandaı lıtsenzııasyz áreket etkeni anyqtalǵan. Bank qyzmetin jáne banktik operatsııalardy atqarýǵa ruqsaty joq. Sonymen qatar, «Sincere Systems Group» ózin Ulybrıtanııalyq ınvestıtsııalyq qor retinde kórsetip, azamattarǵa «Forex Market» naryǵynda ınvestıtsııa salýǵa usynys jasaǵan. Salymnyń eń tómengi mólsheri – 100 AQSh dollary.

Investorlardyń senimine kirý maqsatynda kompanııa «backoffice.s-group.io» degen saıt arqyly ár klıentke jeke ID tirkep, vırtýaldy shottarǵa jalǵan qarajat engizip otyrǵan. Bul saıttyń negizgi maqsaty – salymdardy tirkeý jáne jańa qatysýshylardy tartý bolǵan.

Qazirgi ýaqytta SQO aýmaǵynda osy pıramıdaǵa qarjy salǵan tórt salymshy anyqtaldy.

Jalpy keltirilgen shyǵyn kólemi – 14 mln teńgege jýyq. Degenmen, qabyldanǵan sharalardyń nátıjesinde zardap shekken azamattarǵa keltirilgen shyǵyn tolyǵymen óteldi. 

Departament mamandary osy qarjy pıramıdasynan zardap shekken ózge azamattardy resmı ótinishpen júginýge bolatynyn eskertedi. 

Buǵan deıin Qaraǵandyda «Sincere Systems Group» qarjy pıramıdasyn uıymdastyrýshylar ustalǵanyn jazǵan edik.