SQO dárihanalarynda koronavırýsqa qarsy dári-dármektiń úsh aılyq qory jasalǵan
Búgin SQO densaýlyq saqtaý basqarmasynyń basshysy Qabdrahman Saqtaǵanov brıfıng ótkizip, óńirdiń COVID-19-dyń ekinshi tolqynyna daıyndyǵy týraly málim etti.
Maýsym-tamyz aılarynda oblystyń medıtsınalyq uıymdaryna 432 mln teńgeniń preparattary jetkizildi. Qazir oblystyń statsıonarlarynda dári-dármektiń úsh aılyq qory bar. Koronavırýs pen ókpeniń qabynýyn emdeýge qajet preparattardy alýǵa 299 mln teńge jumsaldy. Іndettiń ekinshi tolqyny bastalǵan jaǵdaıda dári-dármekke qosymsha 217 mln teńge jumsalmaq.
Budan basqa, medıtsınalyq preparattar gýmanıtarlyq kómek aıasynda shetelden jetkizildi. Favıpıravır, paratsetamol, ıbýprofen, azıtromıtsın, tseftrıakson sekildi dáriler ınfektsııalyq jáne provızorlyq statsıonarlarǵa teń bólinip berildi.
«2020 jylǵy 28 shildedegi QR Densaýlyq saqtaý mınıstrliginiń buıryǵymen 5 preparat: ıbýprofen, paratsetamol, rıvaroksaban (Ksarelto), apıksaban, dabıgatran ambýlatorlyq em alýshylarǵa tegin beriledi. Oblystyń emdeý mekemelerine berý úshin 64,4 mln teńgege 59,5 myń naýqasqa jetetin osy dáriler alyndy. Olar emhanalarda bar», - deıdi SQO densaýlyq saqtaý basqarmasynyń basshysy Qabdrahman Saqtaǵanov.
Oblys dárihanalaryn qajetti preparattarmen qamtý úshin turaqtandyrý qorynan 250 mln teńge bólindi.
«Bul tótenshe jaǵdaı kezindegideı dári baǵasy sharyqtap ketpes úshin jasalyp otyr. Bul maqsatqa ár aýdan bıýdjetinen de 5-8 mln teńge kóleminde qarajat bólingen. Alys eldimekenderdiń dárigerlik pýnkterine de qajetti dári-dármek jetkiziledi. Sonymen qatar, ondaǵy mamandardy – 221 adamdy dáritaný boıynsha qaıta oqytamyz. Osylaısha dárihana tapshylyǵy joıylady», - deıdi Qabdrahman Saqtaǵanov.
Oblys aýdandary dári-dármek qoryn jasaýǵa 52,3 mln teńge bóldi. Densaýlyq saqtaý basqarmasy bıyl shaǵyn eldimekenderde 42 dárihana pýnktin ashýdy josparlaǵan.
Olar feldsherlik akýsherlik jáne medıtsınalyq pýnkterde ornalaspaq.