SQO dárigerleri Túrkııaǵa shuǵyl kómek kórsetý úshin ushady

PETROPAVL. QazAqparat – Túrkııadaǵy zilzalanyń saldarymen kúresýge Soltústik Qazaqstan oblysynan bes dáriger attanady. Olardyń barlyǵy joǵary sanatty bilikti mamandar, dep habarlaıdy QazAqparat tilshisi.

SQO ishki saıasat basqarmasynyń málimetinshe, Soltústik Qazaqstan oblysy basqa óńirler sııaqty baýyrlas halyqqa kómek kórsetý úshin medıtsınalyq mamandardy jibermek. Oǵan QR Prezıdenti Qasym-Jomart Toqaevtyń Túrkııadaǵy joıqyn jer silkinisiniń zardaptaryn joıýǵa shuǵyl kómek kórsetý tapsyrmasy negiz bolǵan.

«Bizdiń oblystan Túrkııanyń zardap shekken aımaqtaryna bes dáriger attanady. Olar joǵary sanatty dárigerler: dáriger-hırýrg - Rýslan Abetov, dáriger-reanımatolog – Sergeı Ishın, ortoped-travmatolog – Evgenıı Nıkonov, ekinshi sanatty dáriger-neırohırýrg – Maksım Zadvornyı jáne jalpy praktıka dárigeri – Nııaz Ábdiraqymov», - delingen baspasóz habarlamasynda.

Buǵan deıin qazaqstandyq qutqarýshylar mingen ushaqtyń Túrkııanyń Gazıantep qalasyna qonǵanyn jazǵan edik.

SQO Tótenshe jaǵdaılar departamenti baspasóz qyzmetiniń málimetinshe, zilzaladan zardap shekken aımaqqa óńirden mamandar jiberilmeıdi. Jer silkinisi saldaryn joıýǵa kómek kórsetý úshin respýblıkalyq vedomstvo mamandary attandy. Barlyq qajetti qutqarýshy qural-jabdyqtarmen jaraqtandyrylǵan olar izdestirý-qutqarý jumystarymen aınalyspaq.