SQO dárigerleri shalǵyǵa túsip, ishek-qarny aqtarylǵan 3 jasar qyzdy aman alyp qaldy
Oqys oqıǵa 5 qyrkúıek kúni saǵat 22.00 shamasynda bolǵan. SQO kópsalaly balalar aýrýhanasy bas dárigeriniń mindetin atqarýshy Nurlan Aımanovtyń aıtýynsha, 3 jasar qyzdyń aǵasy shóp shabatyn trımmermen oınaǵan.
Ony júrgizip, buta arasyndaǵy qyzdy baıqamaı qalǵan. Saldarynan qaryndasynyń qaryn tusynan osyp ótken.
«Tilik oń jaq qabyrǵa boıynan bastalyp, sol jaq arqasyna deıin bolǵan. Balanyń ishekterine, asqazanyna, baýyryna zaqym keldi. Asqazany múlde ekige bólingen, baýyrynyń bir bóligin tilip túsken, ol qarnynda bólek jatty. Búkil ishekteri birneshe jerden kesilgen boldy. Qyzdy aman alyp qala aldyq, buǵan biz qatty qýandyq. Bul eń aldymen aýyldyq dárigerlik ambýlatorııanyń, ıAvlenka aýdandyq aýrýhanasynyń bilikti mamandarynyń arqasy. Olar tez arada durys shara qoldanyp, jaǵdaıdy turaqtandyryp, qajetti dári-dármek berip, aýyrsynýdy basty. Aýdandyq aýrýhananyń reanımatology jaǵdaıdy baqylaýda ustap, qajetti anestezııalyq-reanımatsııalyq jumysty joǵary deńgeıde júrgizdi. Qyzdyń qysymy 0-de bolǵan. Ol mańyzdy múshelerdiń jumysyn qalypqa keltirip, sanıtarlyq avıatsııaǵa tapsyrdy», - deıdi Nurlan Aımanov.
Saǵat 00.00 kezinde sanavıatsııamen oblystyq balalar aýrýhanasynan barǵan dárigerler operatsııa jasaýǵa ázir boldy.
Úsh adamnan turatyn brıgada 5 saǵatqa jýyq ota jasap, qyzdyń asqazanyn tigip, qalypqa keltirdi.
«Asqazandy qalypqa keltirý ádette qoldan kelmeıdi.Óte sırek jasalady. Dárigerler sondaı-aq barlyq ishekterin tigip, qandy toqtatty. Ekinshi kúni taǵy da sol brıgadany jiberip, qyzdy oblystyq balalar aýrýhanasyna jetkizdik. Jaǵdaıy aýyr, ol túsinikti de, biraq qalypty. Ulttyq ǵylymı ana men bala densaýlyǵy ortalyǵymen baılanysyp, birneshe ret keńes aldyq. Alǵan jaraqatynyń aýyrlyǵyna qaraı balany sol ortalyqqa jiberetin boldyq. Búgin respýblıkalyq sanavıatsııa kelip alyp ketedi», - deıdi Nurlan Aımanov.
Ota jasaǵandardyń biri balalar hırýrgııasy bólimshe meńgerýshisiniń mindetin atqarýshy Oleg Novıtskıı.
«Jergilikti aýdandyq dárigerler bárin durys jasady. Biz kelgesin-aq birden ota jasaýǵa kiristik. Bul - sırek kezdesetin jaǵdaı, aýyr jaraqat. Ári tún bolǵandyqtan ota jasaý qıyn boldy. Asyqpaı bárin durystap tiktik. Bárimiz birlese qımyldap, balanyń jaǵdaıyn turaqtandyra aldyq. Meniń tájirbıemde buryn mundaı aýyr jaraqat bolǵan emes», - deıdi Oleg Novıtskıı.
Qazir sábı jansaqtaý bólimshesinde. Búkil qajetti em-dom kórsetilip jatyr.
«Ata-analardan balalaryn jalǵyz qaldyrmaýyn jalynyp suraımyn. Dárigerlerge alǵysym zor, qoldan kelgenin jasady. Qoldary altyn. Biz olarǵa ómir boıy qaryzdar bolyp ótemiz. Qyzym bul qıyndyqty jeńip shyǵyp, aramyzǵa qosylatynyna senimdimin», - deıdi qyzdyń anasy, óksigin basa almaǵan Vıktorııa.